பாண்டிங் உடைத்த டிவி

ரிக்கி பாண்டிங்

நேற்று ஆஸ்திரேலிய அணி ஜிம்பாப்வேயுடன் ஆடி வெற்றி பெற்றாலும் அந்த அணியின் காப்டன் ரிக்கி பாண்டிங் ஒரு பிரச்னையில் சிக்கியிருக்கிறார் என்று ஒரு ஆங்கில டீவி சானலில் ஒரு கொசுறு நியூஸ். பாண்டிங் ரன் அவுட் ஆனாராம். கோபத்தில் போகிற வழியில் இருந்த ஒரு டீ.வியைப் போட்டு உடைத்துவிட்டாராம். அவர் இல்லை என்று மறுக்கிறார். ஆனால் மாட்ச் நடைபெற்ற குஜராத் நகர கிரிக்கெட் வாரியக் குழுவினர் ஐசிசியிடம் முறையிட்டு இருக்கின்றனர். அங்கே நம்மூர் போல் எல்லாம் இலவச டீ.வி வினியோகம் கிடையாதே. புது டீவி கேட்டு விண்ணப்பித்திருக்கிறார்களோ என்னவோ. யார் கண்டது.

பத்தாததுக்கு இந்த பாண்டிங் வாயை வைத்துக் கொண்டு சும்மா இல்லாமல் எதையோ வேறு ‘அருளி’ இருக்கிறார். உலகக் கோப்பையில் ரொம்ப தண்ட டீம்களளோடு ஆட வேண்டியிருக்கிறதாம். நம்மூர் ரஞ்சி டிராபி போல் சுமார் டீம்கள் எல்லாம் ஒரு பக்கம், நல்ல டீம்களளெல்லாம் இன்னொரு பக்கம் ஆடினால் தேவலை என்றிருக்கிறார்.

நம் டீமைச் சொல்லவில்லை அய்யா, ஏன் கோபப்படுகிறீர்கள்! இந்த அயர்லேண்ட், கனடா என்று அடி படுவதற்கென்றே ஒரு கோஷ்டி வருகிறது பாருங்கள். அவர்களைச் சொல்லியிருக்கிறார். இது வேவையில்லாத பிதற்றல். அதற்காக தேவையான பிதற்றல் உண்டா என்று கேட்காதீர்கள்.

நியாயமாக இந்த மாதிரி சின்ன சின்ன டீம்களையும் ஆட்டத்துக்கு சேர்த்துக் கொள்ளத்தான் வேண்டும். உலக அரங்கில் ஆடுவது அவர்களுக்கு எப்பேற்பட்ட ஒரு பயிற்சி. எப்பேற்பட்ட எக்ஸ்பீரியென்ஸ். அதை அவர்களுக்குக் கொடுக்க வேண்டிய கட்டாயம் நமக்கு உண்டு. மேலும், எத்தனை நாள் தான் பார்த்த முகங்களையே பார்த்துக் கொண்டிருப்பது. ஒரு சேஞ்சுக்காக புது அயிட்டங்களையும் கொஞ்சம் பார்த்துத்தான் வைப்போமே.

யார் கண்டது. 1979 ‘சிலோன்’ என்ற பெயருடன் ‘அலோனாக’ ஆடிய இலங்கை அணி 1996 உலகக் கோப்பையை வெல்லவில்லையா. அது போல் ‘வேணாடா’ என்று எல்லா அணிகளிடமும் கெஞ்சி அடி வாங்கும் ‘கானடா’ 2024 உலகக் கோப்பையை வெல்லாது என்று எப்படிச் சொல்ல முடியும்.

பாண்டிங் கிடக்கிறார் விடுங்கள். இப்படி நல்வாக்கு சொல்வதற்கு பதில் அவர் பேசாமல் ஆடும் க்ரவுண்டுகளில் எல்லாம் டீ.வியை உடைத்துக் கொண்டிருப்பது எவ்வளவோ தேவலை என்று தோன்றுகிறது.

இன்னொன்றை கவனித்தீர்களா? இது வரை ஆடிய அணிகள் பலவும் அநியாயத்துக்கு பீல்டிங்கில் கோட்டை விட்ட வண்ணம் இருக்கின்றன. நேற்று இங்கிலாந்து பீல்டிங்? அட அட அட. இந்திய அணி தோற்றது. ஒருத்தர் கையிலும் பால் நிற்கவே இல்லை. பீல்டிங் தான் இந்த லட்சணம் என்றால் கிரிக்கெட் ரூல்ஸ் பற்றிய அடிப்படை கூடவா இருக்காது கிரிக்கெட் என்கிற அற்புத ஆட்டத்தை நமக்கு அளித்த இங்கிலாந்திற்கு? ஸ்லாக் ஓவர்களில் 30 அடி வளையத்துக்குள் 4 பீல்டர்கள் இருக்க வேண்டும் என்ற ஆதார அறிவு கூட இல்லை. 3 பேர் தான் இருக்க, க்ரிஸ் ப்ரோட் போட பாட்ஸ்மென் அவுட் ஆக, அம்பயர் ‘நோ பால்’ என்று சிக்னல் கொடுத்து விட்டார்.

இதனால் அறிவது யாதென்றால் –

வேண்டாம். நாமெல்லோருமே அறிவோம்!

வேர்

யோக்கா என்பவர் ஜென் ஞானி. அவரிடம் பல சிஷ்யர்கள் பாடம் பயின்றுவந்தார்கள்.

ஒருநாள், பெரிய வியாபாரி ஒருவன் யோக்காவைப் பார்க்க வந்தான். ‘நான் உங்களிடம் சீடனாகச் சேரவேண்டும்’ என்றான்.

யோக்கா அவனை மேலும் கீழும் பார்த்தார். ‘நீ பெரிய பகட்டுக்காரனாக இருக்கிறாயே. எங்கள் ஆசிரமத்தின் எளிமையான வாழ்க்கைமுறை உனக்கு

ஒத்துவருமா? எல்லாவற்றையும் தூக்கி எறிந்துவிட்டு எளிய துறவியாக வாழ்வது என்பது மிகவும் கடினமான விஷயம். அது உன்னால் முடியுமா?’ என்றார்.

’நிச்சயமாக’ என்றான் அவன். ‘நான் இன்றைக்கே இந்தப் பட்டுத் துணிகளைத் தூக்கி எறிந்துவிட்டுக் கைத்தறித் துணிகளைக் கட்டிக்கொள்கிறேன். எளிமையாகச்

சாப்பிட்டுப் பழகுகிறேன். என்னுடைய சொத்துகளையெல்லாம் தர்மத்துக்கு எழுதிவைத்துவிடுகிறேன். நீங்கள் எதிர்பார்க்கும்படி நடந்துகொள்கிறேன். எனக்கு

ஞானம்மட்டும் கிடைத்தால் போதும்!’

அப்போதும் யோக்காவுக்கு முழுத் திருப்தி வரவில்லை. ‘பார்க்கலாம்!’ என்றார். ‘நான் உன்னைச் சில நாள்கள் கவனித்துப் பார்த்து முடிவு செய்கிறேன்!’

அன்று தொடங்கி அந்த வியாபாரி அவருடைய ஆசிரமத்திலேயே தங்கினான். அவன் சொன்னபடி மிகவும் எளிமையானமுறையில் வாழத் தொடங்கினான்.

பத்து நாள் கழித்து யோக்கா அவனை அழைத்தார். ‘தம்பி, உனக்கு இந்த ஆசிரம வாழ்க்கை சரிப்படாது. நீ வீட்டுக்குப் போகலாம்!’ என்றார்.

‘என்ன குருவே இப்படிச் சொல்லிவிட்டீர்கள்? நான் உங்களுக்காகப் பணத்தைத் துறந்தேன், சொத்துசுகத்தையெல்லாம் துறந்தேன், வசதியான வாழ்க்கையைத்

துறந்தேன். இது போதாதா?’

யோக்கா சிரித்தார். ‘நான் வேரை அறுக்கச் சொன்னேன். நீ சில கிளைகளையும் இலைகளையும் கத்தரித்துவிட்டு அதைப்பற்றிப் பெருமை

பேசிக்கொண்டிருக்கிறாய்!’ என்றார்.

காதல் புராணம் 10

10. குழந்தைகள் பெண்கள் ஆண்கள்

அரிவை [வயது : 20-25]

91

கடிதமெழுதுகையில்

வேண்டுமென்றே

பிழைகள் விடுகிறேன் –

இர‌ண்டாம் முறை

நீ படிப்பதற்காக.

92

உனக்காக எழுத உட்கார்ந்தால்

மசிதீர்ந்த பேனாவும் சுரக்கிறது

தாய்மையுணர்ந்திராதயென்‌

முலைச்சோடிகளைப் போல்.

93

காதலித்த பிறகு தான் புரிகிறது –

கன்னம் வழியே கண்ணீர் வழிய‌

அழுவது எத்தனை சுகமென்று.

94

யாரை வேண்டுமானாலும்

ஓரப்பார்வை பார்த்துக்கொள்ள

உனை அனுமதித்திருப்பது

உன் மீதான நம்பிக்கையன்று –

என் மீதான நம்பிக்கையது.

95

ந‌ம் காதலொரு மகாவிபத்து

என்பதற்காகவே இன்னமும்

நம்புகிறேனந்தக் கடவுளை.

96

அம்மா அப்பா தம்பி நான் என‌

நால்வர் வாழும் சிறுவீட்டின்

மழைக்கால மாலைப்பொழுதில்

ஐவருக்குத் தயாரித்த தேநீரில்

ஒளிந்திருப்பது நீயுமுன் மீதான‌

என் புனிதம் கெடாத பிரியமும்.

97

பேசிப்பிரிகையில் நிகழுமொரு

வல்லிய இறுதிக்கண மௌனம்

பேசி விடுகிறது – பேச நினைத்துப்

பேசாது விடுத்த அனைத்தையும்.

98

உந்தன் கடிநினைவுகளின்

ஏதோவொரு சூட்சமத்தில்

தெறித்ததென் ஆதிகவிதை.

99

உன் மென்பார்வைகளற்ற

இந்நாட்களின் வறட்சியை

நிரப்பிக்கொண்டிருக்கிறது

நீய‌ழுந்தத்தந்த முத்தத்தின்

கடைசித்துளி எச்சிலினீரம்.