சித்ராவிற்கு ஒரு மென்பொருள் நிறுவனத்தில் வேலை. குடும்பத்தில் முதல் பட்டதாரி. வேலை வந்தவுடன் வீட்டுக்கு வேண்டிய சாமான்களையெல்லாம் வாங்கிக் குவித்தார். 2008ல் பொருளாதார மந்தசூழல் காரணமாக, அவரின் நிறுவனம் ஆட்குறைப்பு செய்தது. சித்ராவுக்கு வேலை காலி. ஆனால் வீட்டு வசதிக்காக கிரெடிட் கார்டில் வாங்கியது, தனிநபர் கடன்கள் என வங்கியில் குட்டிப்போட்டு EMIவழியாக குறைந்துக் கொண்டிருந்தன. வருமானம் நின்று போனது. வங்கி அனுமதித்த கலெக்‌ஷன் ஏஜெண்ட்கள் போனில் துரத்த ஆரம்பித்தார்கள். வேலை இல்லை. கொஞ்சம் பணமிருக்கிறது. சித்ரா என்ன செய்வார்?

ஊரிலிருந்து வரும்போது சண்முகத்திடம் உழைப்பைத் தவிர வேறெதுவுமில்லை. அண்ணாச்சி கடைகளில் எடுபிடியாக ஆரம்பித்து, பின் மார்க்கெட்டிங் வேலை செய்து, வாட்டர் பில்டர் விற்று, 10 வருடங்கள் போராடி சொந்தமாய் கடைப் போட்டார். அண்ணாநகரில் இரண்டாவது அவென்யுவில் பகடி கொடுத்து, மனைவி நகையை அடமானம் வைத்து, வங்கி கடன், தனிநபர் கடன், வீட்டின் மீது கடனெல்லாம் வாங்கி ஒரு டெல்லி கம்பெனியின் டீலராக மாறினார். மூன்று வருடங்களில், டெல்லி கம்பெனி போண்டியானது. சரக்கு நின்றுவிட்டது. கொடுத்த முன்பணம் வரவில்லை. வாடிக்கையாளர்கள் விலக ஆரம்பித்தார்கள். வங்கிகள் கொடுத்த கடனுக்கு கடை வாசலில் வந்து நிற்க ஆரம்பித்தார்கள். சண்முகம் என்ன செய்வார்?

சுற்றிலும் கொஞ்சம் காது கொடுத்து கேட்டால், இந்த மாதிரி ஆயிரம் கதைகள். சென்னையில் சொந்தமாய் ஆட்டோ ஒட்டும் எல்லார் பின்பும், ஒரு சிறுதொழில் நாசமாய் போன கதையோ, வேலையிலிருக்கும் போது ஆடின கதையோ நிச்சயமாய் இருக்கிறது. என்னுடைய வீட்டுக்கு ஏர்டெல் பில் வசூலிக்க வரும் நபரில் ஆரம்பித்து, வங்கி கலெக்‌ஷன் ஏஜெண்ட்கள், டை மாட்டிக் கொண்டு பாண்டி பஜாரில் பொம்மைகள் விற்கும் ஆட்கள் என எல்லாரிடத்திலும் கதையுண்டு. சுற்றி சுற்றி வந்தாலும், எல்லா கதைகளும் முடிவது ஒரு இடத்தில். ”நம்பினேன், காசு போயிருச்சு, வேற வழியில்லைன்னு இதுல இறங்கிட்டேன்”

தமிழ்சினிமாவில் எப்படி எந்த சினிமாவும் போண்டியாகும் என்று நினைத்து பூஜைப் போடுவதில்லையோ, அதே மாதிரி தான் யாரும் ஏமாற்றவேண்டும் என்று நினைத்து கடன்கள் வாங்குவதில்லை. ஏமாற்றும் கூட்டம் வெகு சிறியது. எல்லார்க்கும் இன்றைய நாளை விட எதிர்காலம் நன்றாக இருக்கும் என்கிற நம்பிக்கையில், இன்றைக்கு கடன் வாங்குகிறார்கள். பின்னாளில் எதிர்பார்த்தாற்போல நடக்கவில்லையென்னும்போது பணவரத்து நிற்கிறது. தடுமாற்றம் வருகிறது. திட நெஞ்சுக்காரர்கள் எதிர்த்து நிற்கிறார்கள். பலவீனர்கள் ஒடி ஒளிகிறார்கள். ஊரை விட்டே ஒடுகிறார்கள். தற்கொலை செய்கிறார்கள். கொஞ்சம் புத்தியும், நேர்மையும் இருப்பவர்கள் அதிலிருந்து வெளிவரும் சரியான சட்டப்பூர்வமான வழியே தேர்ந்தெடுகிறார்கள்.

இன்றைக்குப் போலவே நாளையும் நமக்கு பணம் கொட்டோ கொட்டென்று கொட்டும் என்கிற நம்பிக்கை தான் எல்லாரையும் கடன்கள் வாங்கச் சொல்கிறது. நாளையின் நிச்சயமற்றத் தன்மையினை யாரும் கடன் வாங்கும்போது யோசிப்பதேயில்லை. கடன் பெறுதல் தப்பில்லை. ஆனால், அதை எப்படி திருப்பி அடைக்கப் போகிறோம் என்கிற தெளிவு இல்லாமல் கடன் வாங்குதல் சொந்த செலவில் சூன்யம் வைத்துக் கொள்ளுதல். மேலும், எந்த அளவிற்கு நம்முடைய வருமானத்திலிருந்து நாம் கடன்களை அடைக்கிறோம் என்பதும் முக்கியம். கடங்காரா-வில் இதைப் பற்றி ஏற்கனவே எழுதியிருக்கிறேன்.

சென்னை OMRல் சந்தை மேலிருக்கும் போது வாங்கி, பின் மந்தச்சூழலில் தவணைகளை கட்டமுடியாமல் ஏராளமான அபார்ட்மெண்ட்கள் இப்போது வங்கிகளின் பிடியில் இருக்கின்றன. அதை முதலில் வாங்கியவர்களால் (முக்கியமாய் மென்பொருள் துறையில் இருப்பவர்கள்) தங்களுடைய மார்ஜின் பணத்தையும், அதுவரை கட்டிய தவணையையும் கூட பார்க்காமல், நெடுஞ்சாண்கிடையாக காலில் விழுந்து, எழுதிக் கொடுத்துவிட்டு வேலையைப் பார்க்கப் போய்விட்டார்கள். வீடு சொத்தாக இருப்பதால் தப்பித்தார்கள், சொத்தில்லாமல் எவ்விதமான பாதுகாப்பும் இல்லாமல் கொடுத்த கடன்களை எப்படி வங்கித் தொல்லையிலிருந்து தப்பி திருப்பி அடைப்பார்கள் ?

Enough Gyan. சித்ராவுக்கும், சண்முகத்திற்கும் என்ன வழி்?

பைனல் செட்டில்மெண்ட்.

வங்கிகள் தங்கள் வாடிக்கையாளர்களுக்கு அளிக்கும் இறுதி வாய்ப்பு தான் செட்டில்மெண்ட். வாடிக்கையாளரால் வாங்கிய கடனை முழுமையாக கட்ட முடியாமல் போனாலோ, அல்லது வியாபாரம் நட்டமானாலோ, வேலை இழந்தாலோ வேறு எதிர்பாராத காரணங்களால் பணவரத்து வங்கிக்கு நின்றாலோ, வங்கி முதலில் வாடிக்கையாளரின் கடன் வரலாற்றினைப் பார்க்கும். நேர்மையான காரணங்களினால், சில மாதங்கள் தவணைகள் நின்று போயிருந்தால் அதை கொஞ்சம்கொஞ்சமாக திருப்பிக் கட்டி, கணக்கினை நேர் செய்து கொள்ளலாம்.

ஆனால், ஆறு மாதங்களுக்கு மேல் தொடர்ச்சியாக தவணைகள் வரவில்லையென்றால் தான் செட்டில்மெண்ட் மாதிரியான விஷயங்கள் பேச முடியும். அதுவும் இரண்டு விதமாக நடக்கும்.

ஒன்று, தொடர்ச்சியாக ஆறு மாதங்களாய் உங்கள் காசோலை பவுன்ஸ் ஆனாலோ அல்லது ஈ சி எஸ் எகிறினாலோ முதலில் மீண்டும் முயற்சிப்பார்கள். அது முடியாத பட்சத்தில், கால் சென்டரிலிருந்து பெண்கள் பேசி, ஆட்களை அனுப்பி வசூலிக்க முயற்சிப்பார்கள். அப்படியும் வரவில்லையென்றால் முதலில் ஒரு வக்கீல் நோட்டீஸ் வரும். அந்த நோட்டீஸ், வசூலிக்க வேண்டிய தொகையினைக் குறிப்பிட்டு, இன்ன தேதியில், இன்ன இடத்தில் இன்னாரை சந்தித்து பேசி, சுமூகமாக முடித்துக் கொள்ளலாம் என்று இருக்கும். இது ஒரு வழி.

இல்லையென்றால், நேரடியாக வங்கியிலிருந்தே மக்கள் நீதிமன்றத்திற்கு (Lok Adalat)வரச் சொல்லி அழைப்பு வரலாம். மக்கள் நீதிமன்றம் என்பது ரிட்டயர் ஆன நீதிபதிகள் உட்காரும் ஒரு இலவச சட்ட சமரச அமைப்பு. அதற்கு சட்டரீதியாக உங்களை தண்டிக்கவோ, வழக்கு தொடரவோ அதிகாரமில்லை.

நீங்கள் போனால், வங்கியிலிருந்து வந்திருக்கும் ஆட்களும், நீங்களும் அருகருகில் அமர்ந்து “ஐயா” என்று ஆரம்பித்து வங்கி ஆட்கள் உங்கள் மீது புகார் பட்டியல் வாசிப்பார்கள். இவர் இவ்வளவு மாதங்களாய் பணம் தரவில்லை. இன்னாருடைய அசல் தொகை இது. வட்டி இது. நாங்கள் சுமூகமாக வாடிக்கையாளருக்கும் பயனளிக்கும் வகையில் எங்களுடைய தொகையிலிருந்து கொஞ்சம் குறைக்கிறோம். தவணைகள் தருகிறோம். வாடிக்கையாளரை கட்டச் சொல்லுங்கள். உடனே, நீதிபதி உங்கள் தரப்பு வாதத்தினையும் கேட்பார். நீங்களும், உங்கள் சொந்த/சோகக் கதைகளை சொல்லலாம். நீங்களும் வங்கியும் ஒரு தொகைக்கு ஒத்துக் கொண்டால், அங்கேயே வங்கி நீதிபதி முன்னிலையில் உங்களுக்கான தொகை என்ன, எவ்வளவு தவணைகள், தள்ளுபடி எவ்வளவு, இதுவே இறுதியும், முடிவானதுமான செட்டில்மெண்ட் என்றும் ஒரு லெட்டர் தருவார்கள். அத்தோடு கதை ஒவர்.

ஒரு வேளை, மக்கள் நீதிமன்றத்தில் ஒத்து வரவில்லையென்றால், வங்கி நேரடியாக உங்களோடு பேரம் பேசலாம். இது நடக்க வேண்டுமெனில், குறைந்தபட்சம் கடன் தவணை 9-12 மாதங்கள் வரை தரப்படாமல் இருக்கவேண்டும். வங்கியே நேரடியாக அவர்களின் அலுவலகத்தில் அழைத்து மீண்டும் அசல், வட்டி இன்னபிற தொகை நிலுவைகளைச் சொல்லி, வட்டியை முழுவதுமாக ரத்து செய்கிறோம். பெனால்டி, தாமத கட்டணங்களை ரத்து செய்கிறோம். அசலில் இவ்வளவு தள்ளுபடி செய்கிறோம் என்று இறங்கி வரலாம். அங்கேயும் நீங்கள் உங்கள் நிலையை எடுத்துச் சொல்லி, செட்டில்மெண்ட் கோரலாம். எனக்குத் தெரிந்தவரை, தனியார் வங்கிகள் 40% அசல் தொகை வரை செட்டில்மெண்ட் கொடுத்ததுண்டு. வட்டி, பெனால்டி எல்லாம் ரத்து செய்யப்படும். ஆனால், அந்த செட்டில்மெண்ட் தொகையினை ஒழுங்காக கட்ட வேண்டும். அதைக் கட்டத் தவறினால், வேதாளம் மீண்டும் முருங்கை மரம் ஏறும். நீங்கள் மொத்தத் தொகை, வட்டி, பெனால்டிக்கு பதில் சொல்லவேண்டும்.

பொதுவாக, வங்கிகளில் கடன்கள் வசூலிப்பதை பக்கெட் என்று பிரிப்பார்கள். பக்கெட் 1 என்பது ஒன்றிலிருந்து இரண்டு மாதங்கள் தவணை வராமல் இருப்பது. இது முழுக்க முழுக்க கால்சென்டர் பெண்களின் பாலோ-அப் வேலை. பக்கெட் 2 என்பது இங்கிருந்து கீழேப் போவது. இப்படி கிட்டத்திட்ட பக்கெட் 6 வரைக்கும் போகும். பக்கெட் 6 என்பது கிட்டத்திட்ட வங்கி கைக்கழுவி விட்ட வாடிக்கையாளர். அவரிடமிருந்து எது வசூலித்தாலும் அது வங்கிக்கு லாபம் என்கிற நிலையில், அதை வாரா கடன்கள் (Non performing Assets / Defaults) என்கிற அளவில் தள்ளி விடுவார்கள். பெரும்பாலும் பக்கெட் 6 போவது கடினம். ஏனென்றால், ஒவ்வொரு பக்கெட்டிலும் கலெக்‌ஷன் ஏஜெண்டுகளுக்கான கமிஷன் ஏறும். உதாரணம், பக்கெட் 4-5ல் இருந்து செட்டில்மெண்ட் போனால், செட்டில்மெண்ட் தொகையில் கிட்டத்திட்ட 15-20% வரைக்கும் கலெக்‌ஷன் ஏஜெண்டுகளுக்கு போகும் சாத்தியங்கள் உண்டு. ஏன் தொடர்ச்சியாக, வங்கியை விட இந்த கலெக்ஷன் ஏஜெண்ட்கள் உங்களின் தவணையைப் பற்றிக் கவலைப்படுகிறார்கள் என்றால் இது தான் காரணம்.

இதையெல்லாம் தாண்டி வாடிக்கையாளர் பணம் திருப்பித் தரவில்லையென்றால், அவரின் மீது செக்‌ஷன் 138, காசோலை மோசடி வழக்குப் போட்டு, நோட்டீஸ் அனுப்பி, அதை வாங்காமல் இருந்தால், அதை பிணையில்லா வழக்காக மாற்றி, ரோஜா மாதிரி கோர்ட்டுக்கும் வீட்டுக்கும் உங்களை அலைய விடலாம். அதை செய்யும் சக்தியும், தகுதியும் வங்கிக்கு இருக்கிறது. ஆக வாங்கிய கடனை எதிர்பாராதக் காரணங்களினால் அடைக்க முடியாமல் போனால் அது அழிந்துவிடும் என்று ஒரு போதும் என்னாதீர்கள். கடன்களை செட்டில்மெண்ட் போய் அடைத்தாலேயொழிய ஆறு மாதங்களில் சிபிலில் (CIBIL) உங்கள் பெயரைத் தூக்கமாட்டார்கள். சிபிலில் பெயர் இருந்தால், அடுத்த ஐந்து வருடங்கள் – எந்த வங்கியும் கடன் தராது. சிங்கி தான் அடிக்க வேண்டும். அதற்கு மேலும் கடன் வேண்டுமென்றால், கந்துவட்டி வாங்கி குடும்பம் நடுத்தெருவுக்கு வந்துவிடும். ஆகவே, வாங்கிய கடன்களை செட்டில்மெண்ட் செய்தாவது முடியுங்கள்.

செட்டில்மெண்ட் வாங்கும் போது அதில் என்ன எழுதியிருக்கிறது என்று படியுங்கள். Full and Final Settlement of all dues outstanding என்கிற வாசகமும் all legal cases & other actions taken by the bank will be withdrawn என்கிற வாசககும் கட்டாயம் இருக்கவேண்டும். அது இல்லாமல் பேப்பரை வாங்காதீர்கள். செட்டில்மெண்ட் தாளிலேயே, நீங்கள் ஒப்புக் கொண்ட பணமும், அதன் தவணைகளும் தெளிவாகக் குறிப்பிட்டு இருக்கவேண்டும். அசல் உங்களுக்கும், நகல் வங்கிக்குமாக இரண்டு பிரதிகளில் உங்கள் கையெழுத்தும், வங்கி அதிகாரியின் கையெழுத்தும் இருக்க வேண்டும்.

இதிலிருந்தெல்லாம் தப்பிக்க ஒரு வழி இருக்கிறது. ரூ. 1.75 தட்சணையும், யாரிடமும் சொல்ல மாட்டேன் என்று உறுதிப்பிரமாணமும் எடுத்தால் தனியாகச் சொல்லிக் கொடுக்கிறேன் மெக்சிகோ சலவைக்காரி ஜோக் போல இதைப் பொதுவில் சொல்ல முடியாது.

இதுநாள் வரை, பணம் பற்றியும், நுட்பம் பற்றியும் கிட்டத்திட்ட 6 மாதங்களாக எழுதியவை அனைத்தும் என்னுடைய சொந்த அனுபவம். நேரடியாக அனுபவித்தது, நண்பர்களின் வாழ்வில் பார்த்தது, பாதித்தது, படித்தது, உணர்ந்தவைதான்.

பைனல் செட்டில்மெண்ட் என்பது இந்தக் கட்டுரைக்கான தலைப்பு மட்டுமல்ல, இப்போதைக்கு இந்தப் பகுதிக்கும்கூட. இப்போது விடைபெறுகிறேன். மீண்டும் வேறு உரையாடலை ஆரம்பிப்போம். நன்றி. வணக்கம்.

படம்: நன்றி – passionforcinema.com

சிபிஐ ரெய்டு ஒடிக் கொண்டிருக்கும் கலைஞர் டிவியில் நான் விரும்பிப் பார்க்கும் நிகழ்ச்சி ‘நாளைய இயக்குநர்’. ஞாயிறு காலை 10.30 மணிக்கு. இரண்டு வாரங்களுக்கு முன்பு பாண்டஸி என்கிற ’தீம்’மில் குறும்படங்கள். ஒரு படம் என்னை கவர்ந்தது. எல்லா விபத்துக்களுக்கும் ஒரு கணக்கு உண்டு என்றும் அதை நிரூபிக்கும் ‘கிறுக்கு’ பேராசியராக நண்பர் சத்யேந்திரன் அல்காரிதம்கள், கணக்குகளோடும் உலா வந்து, இறுதியில் அவரிடம் கேள்விக் கேட்கும் ஒருவரே சொல்லி வைத்தாற்போல விபத்துக்கு உள்ளாவார். இது சாத்தியமா?

தசாவதாரத்தின் ஆரம்பத்தில் ‘பட்டர்ப்ளை எஃபெக்ட் அல்லது கயாஸ் தியரி’யினை வைத்து எல்லாவற்றுக்கும் முடிச்சுப் போடும் கமலின் பேச்சில் படம் ஆரம்பிக்கும். அதாவது ஒன்றுக்கு ஒன்று தொடர்பே இல்லாத பல்வேறு விஷயங்களுக்கு இடையே ஒரு நூலிழை தொடர்பிருக்கிறது, அதனாலேயே சில விஷயங்கள் சம்பந்தா சம்பந்தமில்லாமல் தோன்றினாலும், அதற்குள் கொஞ்சமாய் பம்மல் ____ சம்பந்தம் அளவிற்காவது சம்பந்தமிருக்கும். இது சரியா?

போன வாரம் போர்ஸ்கொயர் வலைப்பதிவில் உலகின் மோசமான உணவு விடுதிகள் எவையெவை என்று செக் இன் செய்ததை வைத்து சொல்லியிருக்கிறார்கள். ஆனால், அவர்கள் சொன்னது நிஜமா?

டேட்டா அனல்டிக்ஸ் (Data Analytics) என்பது இன்றைக்கு தொழில் நுட்பத் துறையில் மிக முக்கியமான சொல். கொஞ்சம் நுட்ப கிறுக்கு பிடித்திருக்கும் என்னை மாதிரி ஆசாமிகளுக்கு இந்தத் துறையில் தான் பேரார்வம். அடுத்த பத்தாண்டுகளில் மிக வேகமாக வளரப் போகிற, வளர்ந்துக் கொண்டிருக்கிற துறையிது. உலகம் கன்னா பின்னாவென்று டேட்டாவினை உருவாக்கிக் கொண்டிருக்கிறது. டேட்டா என்றால் நாம் இன்னும் டேட்டா எண்ட்ரி ஆப்ரேட்டர்கள் உள்ளீடு செய்வதை நினைத்துக் கொண்டிருந்தால், நாம் அதிலிருந்து வெகு வேகமாய் முன்னேறி எங்கோப் போய் கொண்டிருக்கிறோம்.

இந்த நொடியில், நீங்கள் அனுப்பும் குறுஞ்செய்தி, நீங்கள் இருக்கும் இடத்தினை கவர் செய்யும் செல் போன் டவர்கள், ஜிபிஎஸ், ஜிபிஆரெஸ், உங்கள் மின்னஞ்சல்கள், சாட் சம்பாஷனைகள், கிரெடிட் கார்டு பரிமாற்றங்கள், வங்கி விஷயங்கள், RFIDயிலும், Barcode-லும் சூப்பர் மார்க்கெட்டிகளில் நீங்கள் மேற்கொள்ளும் பொருட் பரிமாற்றங்கள், இன்ன பிற சமாச்சாரங்கள் என எல்லாமும் ஏதோ ஒரு டிஜிட்டல் துகளாக மாறி எங்கோ மேகத்திலோ அல்லது மேகக் கணிமையிலோ இப்போதைக்கு மறைந்துக் கொண்டிருக்கலாம். ஆனால், இவையத்தனையும் நோண்டி, நொங்கெடுத்து உங்களின் உண்மையான ஜாதகத்தினை கூடிய சீக்கிரத்தில், உங்களுக்கு தெரிந்த ப்ரொளசரின் திரையில் வரலாம்.

நாம் வழக்கமாய் செய்யும் பல காரியங்களில், நம்மையும் அறியாமல் நாம் நம்முடைய அடையாளத்தை விட்டுக் கொண்டே செல்கிறோம். கிரிமினல் மற்றும் பாரசின்க் துறைகளில் வழமையாய் சொல்லும் வசனம், குற்றவாளி எவ்வளவு புத்திசாலியாய் இருந்தாலும், அவனையும் அறியாமல், அவன் தன் அடையாளத்தை விட்டுச் செல்வான் என்பது. நாம் குற்றவாளிகள் அல்ல. சாதாரண மனிதர்கள். நாம் நிறைய விஷயங்களை நம்முடைய டேட்டாவில் விட்டு செல்கிறோம். இதற்கு முன்னால் வரை, நுட்பம் இந்தளவிற்கு டேட்டாவினை நுணுக்கி ஆராயும் அளவுக்கு வளரவில்லை.

இன்றைக்கு கணினியின் வேகம் அதிகரித்துவிட்டது. முன்பு ஆராய்ச்சி சாலைகளிலும், நாசா மாதிரியான அறிவியல் வெளியிலும் நடந்த ‘ப்ராசஸிங்’ இன்றைக்கு மடிக்கணினியிலேயே வந்துவிட்டது. டேட்டாவினை சேகரித்தல் (aggregation/acquisition), அதை ஆராய்தல் (analysis), நுணுக்கி நுணுக்கி ஆய்ந்து அதிலிருந்து முடிவுகளை கொண்டுவருதல் (insights / data points), அதிலிருந்து பிற்காலத்திற்கான முடிவுகளை எடுத்தல் (prediction) அதை மனிதர்களுக்கு தகுந்தாற்போல மாற்றியமைத்தல் (personalization) & அவர்களின் குணாதிசயங்களுக்கு ஏற்றாற்போல பொருத்துதல் (behavioral targeting) என நீளும் சாத்தியங்களில் தான் உங்கள் பையனுக்கும், பெண்ணிற்கும் 2020ல் வேலை இருக்கிறது. இதை செய்ய ஆரம்பிக்கும் நிறுவனங்கள் 2020ல் இந்தியாவின் முன்னோடி நிறுவனங்களாகும் சாத்தியங்கள் மிகத் தெளிவாக இருக்கின்றன.

மேலே சொன்ன ஒவ்வொன்றும் ஒரு துறை. ஒவ்வொன்றைப் பற்றியும் புத்தகம் எழுதக் கூடிய அளவிற்கு விஷயமிருக்கிறது. ஒவ்வொன்றிலும் இன்றைக்கு ஜாம்பவான்கள் உருவாக ஆரம்பித்து இருக்கிறார்கள். இதுதான் வருங்கால உலகம். டேட்டா தான் பரம்பொருள். பரமாத்மா. எல்லாம். டேட்டாவினைக் கொண்டு எதை வேண்டுமானாலும் செய்ய முடியும்.

அமேசான் எப்படி நீங்கள் தேர்ந்தெடுக்கும் புத்தகத்திற்கு இணையாகப் புத்தகங்களை அறிமுகப்படுத்துகிறது, லிங்க்ட் இன் எப்படி தெரிந்தவர்களாக பார்த்து உங்களைத் தேர்ந்தெடுக்கச் சொல்கிறது, கூகிள் எவ்வாறு தொடர்ச்சியாய் உங்களின் தேடலுக்கு ஏற்றாற்ப்போலத் தெரிவுகளைத் தருகிறது, நெட்ப்ளிக்ஸ் எப்படி கில்மா படங்களாக சிபாரிக்கிறது, ஒகேக்யுபிட் எப்படி ஆசியனாக இருந்தால் லத்தின் அமெரிக்க பெண்கள் மடிவார்கள் என்று சொல்கிறது, சிட்டி வங்கி எப்படி தேர்ந்தெடுத்து உங்களுக்காக மட்டும் வொயின் வகைகளின் மீது சிறப்புத் தள்ளுபடித் தருகிறது …… இப்படி இப்போதே டேட்டாவினை வைத்துக் கொண்டு விளையாடும் சித்து விளையாடல்களை வரிசைப் படுத்தலாம். ஆனால், நாம் இப்போது பார்ப்பது அத்தனையும் ஜூஜுப்பி ட்ரைய்லர் சமாச்சாரம். மெயின் பிக்சர் இனிமேல் தான் ஆரம்பம்.

ஆக்கப்பூர்வமாய் செய்து கீழே இருக்கும் Minority Report GAP கடை மாதிரி தனியாய் விளிக்கமுடியும்.

அல்லது Bourne தொடர்கதைகள் போல ஒட்டுமொத்தமாய் டேட்டாவினை அழித்துவிட்டு, உங்களை ஒட ஒட அடிக்க முடியும். இதன் சாத்தியங்கள் உலகமெங்கிலும் எதிரொலிக்க ஆரம்பித்து விட்டது. இணையப் புரட்சிக்கு பிறகான மிக முக்கியமான புரட்சி இதுவாக தான் இருக்கும். இதன் பயன்பாடுகள், சாதக பாதகங்கள் குறித்து இனி திமுக/அதிமுக மேடைகள் போல நீட்டி முழக்கிப் பேசலாம். ஆனால் இதுதான் நிதர்சனம். வருங்கால யதார்த்தம். நீங்கள், நான், பக்கத்து வீட்டு அக்கா, எதிர் வீட்டுப் பெண், ஷகிலா, ஜிம்மி, பிரபுதேவா, நயன்தாரா என எல்லாரும் பைனரிக் கற்றைகளாய் மாறி, மேகக் கணிமையில் சாவில்லாமல் உலாவுவோம். கேட்க கொஞ்சம் மேட்ரிக்ஸ் தனமாய் இருந்தாலும் இது அடுத்த 20-30 ஆண்டுகளில் சாத்தியமாகும் என்றுத் தோன்றுகிறது.

என்ன நடக்கும்?

நீங்கள் ஐஆர்சிடிசியில் வழக்கமாய் ரெயில் புக் செய்துப் போகிறீர்கள். டேட்டா அனல்டிக்ஸையும், பிரிடிக்டிவ் மாடல்களையும் பயன்படுத்தி, உங்கள் பரிவர்த்தனைகளை அங்குலமங்குலமாக ஆராய்ந்து கீழ்கண்டவற்றினை செய்ய முடியும்.

1. நீங்கள் அடுத்து உத்தேசமாய் எப்போது பிரயாணம் செய்வீர்கள் ?
2. எந்த ஊருக்குப் போவீர்கள் ?
3. ஏசியா, நான் – ஏசியா, ஸ்லீப்பரா ?
4. உங்களோடு யார் பயணம் செய்வார்கள் ?
5. என்ன உணவருந்துவீர்கள் ?
6. என்ன கையில் கொண்டு போவீர்கள் ?

இதைத் தாண்டி இன்னும் பல அருள்வாக்குகளை அருளலாம். இது ஜாதகம், ஜோசியம், கட்டம், வான சாஸ்திரம், பில்லி, சூனியம், ஏவல், ஒவல் சமாச்சாரமில்லை. முழுக்க முழுக்க அறிவியல்ரீதியாக சாத்தியமாகப் போகிற விஷயம்.

வைணவத் தத்துவங்களில் சங்கரரின் அத்வைதம் மிகப் பிரபலம். ஜீவாத்மா, பரமாத்மா என்று இரண்டு நிலை இல்லை. எல்லாமே ஒன்றுதான் என்பது அது. அது மாதிரி இனி வருங்கால உலகில் நீங்கள் வேறு, உங்கள் டேட்டா வேறு என்கிற நிலை இருக்காது. நீங்கள் தான் டேட்டா. டேட்டா தான் நீங்கள். சின்மயா நகரில் தாடி வளர்த்திருக்கும் முன்னோடி கவிஞர் ’பைனரிகுடும்பி’- “எண்களாகவும், துகளாகவும் மாறிப் போன சனக்கூட்டத்தில், எகிறிக் கடித்த நாய் உணர்த்தியது நான் இன்னும் ரத்தமும், சதையுமான மானுடன் தானென்று” கவிதையெழுதுவார். அதுவும் மரபா, இல்லையா என்று நம்மில் 400 பேர்கள் அடித்துக் கொள்(ல்)வார்கள்

[படம்: நன்றி - பார்ச்சூன் இதழ்]

திமுக – காங்கிரஸ் கூட்டணி இழுபறியில், பட்ஜெட் எல்லோருக்கும் மறந்தேப் போனது. பட்ஜெட் நாளில் சின்னதாய் நான் எழுதியது இங்கே. ஒரு வாரம் முடிந்து எல்லா நிபுணர்களும் பட்ஜெட் உரையினை அலசி ஆராய்ந்து, கொஞ்சம் புன்னகையும், நிறைய உதடு சுழிப்புமாக இருக்கிறார்கள். வடிவேலு மொழியில் “பினிஷிங் சரியில்லையேப்பா”

பட்ஜெட்டில் பிரயோசனமான விஷயங்கள் ஏற்கனவே எழுதியாச்சு. ஆனால், மிக முக்கியமான மூன்று காரணிகளுக்கு பட்ஜெட்டில் முழுமையான விடைகள் இல்லை என்பதுதான் சோகம். பணவீக்கம், Fiscal deficit நிலை & கறுப்புப் பண விவகாரம்.

ஐந்து மாநில தேர்தல்கள், இழுபறிகள், மக்கள் சார்ப்பு திட்டங்கள் என காங்கிரஸ் அரசின் மீதான அழுத்தம் மிகத் தெளிவாகத் தெரிகிறது. 1991ல் ஆரம்பித்த பொருளாதார சீர்திருத்தங்களின் இருவதாவது ஆண்டு இது. இந்நிலையில், இந்தியாவினை அடுத்தக் கட்டத்திற்கு கொண்டு செல்ல வேண்டிய சீர்திருத்தங்களையோ, மாற்றங்களையோ நாம் இன்னமும் யோசிக்கக் கூடவில்லை என்பது தான் யதார்த்தம்.

இந்தியாவில் நகரமயமாக்கம் மிக வேகமாக நடந்து வருகிறது. இந்நிலையில் எல்லாருக்கும் ஒரே மாதிரியான வருமான வரி வரம்புகள், சலுகைகள் சங்கடப்படுத்துகின்றன. சென்னையில் மதியம் ஒரு சாப்பாட்டின் விலை ரூ.50. வேலூரில் விலை ரூ.35 ஆக, பெருநகரத்தில் விலைவாசி 30% அதிகம். கிட்டத்திட்ட மூன்றில் ஒரு பங்கு. சென்னையில் ரூ.10000 சம்பாதித்து செலவு செய்வதற்கும், வேலூரில் அதையே சம்பாதித்து செய்வதற்கும் நிறைய வித்தியாசங்கள் இருக்கின்றன. பெருநகரங்களில் மருத்துவ செலவு, போக்குவரத்து, உணவு, இருப்பிடம், சேவைகள் எல்லாமே விலை அதிகம். இந்நிலையில், நேரடி வரி குறியீட்டில் (Direct Tax Code) இந்த அடிப்படையில் எதுவுமே இல்லை.

தனிப்பட்ட முறையில், பெருநகரங்கள், சிறு நகரங்கள், கிராமங்கள் எனப் பிரித்து அதற்கேற்றாற்ப் போல வரி விதிப்புகள் இருத்தல் நலம். இப்போது இது வீடு வாங்கல்/விற்றல் மாதிரியான சமாசாரங்களில் ரிஜிஸ்டர் அலுவலகத்தில் உண்டு. நகர எல்லைக்கும், கிராமங்களும் வெவ்வேறு வரி விதிமுறைகள் உண்டு. நகரங்களில் குறைந்தப்பட்சம் 3-5 இலட்சமும், கிராமங்களில் 2 – 3 இலட்சம் வரையிலும் வருமான வரி இருக்கக்கூடாது. [ப்யுரிஸ்டுகள் நிற்க: விவசாய வருமானம், வருமான வரியின் கீழ் வராது என்று பாய்வீர்கள் என்றுத் தெரியும். ஆனாலும், இது தேவை]

பண வீக்கத்தினைக் கட்டுப்படுத்துதல், வேலைவாய்ப்பை அதிகரித்தல், பற்றாக்குறையினைக் குறைத்தல் என முப்பெரும் எதிரிகள் பிரணாப் தாவின் கீழ் அவரின் கட்டளைக்கு காத்திருந்தன. ஆனால், வெளியே இனிப்பாகவும், உள்ளே கசப்பாகவும் தான் பட்ஜெட் முடிந்தது. அடிமட்ட ரீதியிலான மாறுதல்கள் எதுவுமே செய்யப்படவில்லை. மேம்பூச்சாக அறிவிக்கப்பட்டுள்ள திட்டங்களில் எவ்வளவு உண்மையிலேயே செயல்படும், எவ்வளவு இழுக்கும், எவ்வளவு வரவே வராது என்பதுப் பற்றிய தெளிவான சிந்தனைகள் இதில் இல்லை. உடனே சடாலென்று சீதாராம் யெய்சூரி போல, இந்த பட்ஜெட் பணக்காரர்களுக்கானது, ஏழைகளின் விடியலுக்கு ஒன்றுமேயில்லை என்று பல்டி அடிக்கமுடியாது. ஆனால், யெய்சூரியின் ஒரு பாயிண்ட் சரியானது. கட்டமைப்பு ரீதியான அடிப்படை மாற்றங்கள் (structural changes) இல்லாமல், நாம் முன்னேற முடியாது. அம்மாதிரியான எவ்விதமான மாற்றங்களும் இந்த பட்ஜெட்டில் சொல்லப்படவில்லை.

‘கற்றது தமிழ்’ பார்த்ததிலிருந்தே நமக்கு மென்பொருள் துறையின்மீது ஒரு லவ்/ஹேட் உறவு இருந்துவருகிறது. இந்நிலையில், STPI சலுகைகள் ரத்து, சிறப்புப் பொருளாதார மண்டலங்களின் மீது, 18.5% குறைந்தப்பட்ச மாற்று வரி (MAT – Minimum alternative tax) எனப் போட்டதில் சிறிய, இடைநிலை மென்பொருள் நிறுவனங்களுக்கான competitiveness அடிப்படுமோ என்கிற பயம் எழாமல் இல்லை. இடைநிலை நிறுவனங்களால், இன்போஸிஸ்/காக்னிசண்ட் மாதிரி தங்களுடைய சேவையின் விலையினை நிர்ணயிக்க முடியாது. இது இடைநிலை நிறுவனங்களுக்கான மிகப் பெரிய body blow. இந்தியாவில் வேகமாக வளர்ந்து வரும் சேவைத் துறையில், மென்பொருள்/கால் சென்டர் துறைகள் மிக முக்கியமானவை. நேற்றைய செய்தியில் சிறப்புப் பொருளாதார மண்டலங்களின் மீதான வரியினை பரிசீலனை செய்யலாம் என்று காமராஜர் பாணியில் பிரணாப் தா தலையாட்டியிருக்கிறார்.

ப.சிதம்பரம் நிதியமைச்சராக இருந்த காலத்தில், இந்தியா முழுமைக்குமான பொருட்சேவை வரி (Goods & Service Tax) ஏப்ரல் 2010ல் அமுல்படுத்தப்படும் என்றார். இதற்காக கமிட்டிகள், குழுக்கள் எல்லாம் அமைத்து அவர்களுக்கும் தங்களுடைய பரிந்துரைகளை அரசுக்கு கொடுத்துவிட்டார்கள். ஆனால், சில மாநிலங்கள் இந்த பொருட்சேவை வரியினை எதிர்க்கின்றன. இதன் மூலம் மாநிலங்களுடைய வருவாய் ஆதாரங்களில், மத்திய அரசு கைவைத்து, லவட்டிக் கொண்டு போவதாக குற்றச்சாட்டு. அதன் நதி,ரிஷிமூலங்களுக்கு போக வேண்டாம். பிரணாப் தாவால், 2011லும், ஏன் 2012லிலும் இதை கொண்டு வரமுடியுமா என்றுத் தெரியவில்லை. நம்முடைய வரிகள் பற்றிய பார்வைகள் வெவ்வேறாக இருக்கின்றன. இதை ஒருங்கிணைத்தாலேயொழிய நீண்ட கால கணக்கீடுகள் சாத்தியமல்ல.

இந்தியாவில் 2004ல் FRBM Act என்கிற ஒன்றினைக் கொண்டு வந்தார்கள். FRBM – Fiscal Responsibility and Budget Management Law. இதன் சாராம்சம் இந்தியாவின் பட்ஜெட்டினை எப்படி நிர்வகிப்பது. எப்படி நம்முடைய வருமானப் பற்றாக்குறையை ஒழிப்பது. நம்முடைய பிஸ்கல் பற்றாக்குறையை குறைப்பது. முக்கியமாய் நிதியமைச்சர்கள் தங்கள் இஷ்டத்துக்கு பட்ஜெட்டினை படிக்காமல் இருப்பது. இது நடந்ததா என்றெல்லாம் குறுக்குக் கேள்விக் கேட்காதீர்கள்.

பிரணாப் தா இந்த வருடம் சொல்லியிருக்கும் 4.6% (on GDP) பிஸ்கல் பற்றாக்குறைத் தெளிவில்லாதது. பெட்ரோலிய நிறுவனங்களுக்கான மான்யம் பட்ஜெட்டில் வெறும் ரூ.40,000 கோடி மட்டுமே. மேற்கு ஆசியாவின் அரசியல் ஸ்திரத்தன்மை, புரட்சி கோஷங்கள், கடாபி மாதிரியான முட்டாள் தலைவர்கள் பெட்ரோல் கிணறுகளை எரிக்கிறேன் என்று சொல்லும் தம்பட்டம், உலக சந்தையில் கச்சா எண்ணெயின் விலை என பல காரணிகள் நமக்கு எதிராக இருக்கின்றன. நிஜத்தில், குறைந்தப் பட்சம் 100,000 கோடிகள் இல்லாமல் இதை ஈடுகட்ட முடியாது. இது நாம் கணக்குப் போட்டிருப்பதை விட 250% அதிகம். இந்தப் பற்றாக்குறையை எந்த கணக்கில் சேர்ப்பது?

பட்ஜெட்டுக்கு-வெளியில் (off-budget) செலவாக எரிப்பொருள் சந்தைப்படுத்தும் நிறுவனங்களுக்கு கிட்டத்திட்ட 75,000+ கோடி ரூபாய்கள் தரப்படும் என்று பட்ஜெட் முடிந்த கையோடு வெளியே வந்து சொல்லி விட்டார். இந்த செலவினை எங்கிருந்து ஈடுக் கட்டப் போகிறார்? கிராமப்புற கட்டாய வேலைவாய்ப்புத் திட்டத்தையும் பட்ஜெட்டில் ஊக்கம் (stimulus) என்கிற வகையில் கொண்டு வந்து விட்டார். இதை செலவீனமாகக் காட்டவே முடியாது. ஆக நம்முடைய செலவீனங்களை நாம் வேறு பெயர் கொடுத்து மறைத்துக் கொண்டிருக்கிறோம்.

FRBM இருந்தும் தொடர்ச்சியாக நிதியமைச்சர்கள் நம்முடைய வரவு/செலவு கணக்கில் விழும் வேட்டியை, துண்டாக காண்பிக்கிறார்கள். பட்ஜெட்டுக்கு வெளியில் ஆகும் செலவுகளை பட்ஜெட்டில் போடுவதில்லை. இதனால் பற்றாக்குறை குறைவானதுப் போலத் தெரிந்தாலும், உண்மை அதுவல்ல. போனமுறை (2010-11) 3ஜி ஏலத்தில் அரசுக்கு கிடைத்த பணத்தால் கொஞ்சம் வேட்டியின் ஒரம் தைக்கப்பட்டது. வருடாவருடம் அந்தமாதிரி போனஸ் கிடைக்காது. மேலும், பிரணாப் 9% வளர்ச்சி விகிதத்தை எட்டுவோம் என்கிற கருத்தாக்கத்தில் தான் எல்லாவற்றையும் எக்செலில் இழுத்திருக்கிறார். இப்படி இழுத்தால், 2020ல் நாம் உலக வல்லரசாகி, சீனாவுக்கு சவால் விட்டு, அமெரிக்காவை அடிமையென்று சொல்லலாம். ஆனால், இம்மாதிரியான எண்கணித நீட்டிப்புகள் (extrapolations) வெறும் கனவுகள். 2008ல் ஆனதுப் போல 2014ல் இன்னுமொரு மந்தசூழல் வராது என்பதற்கு என்ன நிச்சயமிருக்கிறது ?

ரஞ்சன் வர்மாவின் இந்தப் பதிவில் சொல்லியிருக்கும் FRBM வழிமுறைகளில் ஒன்றினைக் கூட இதுவரை நாம் பார்க்கவில்லை. அதில் சொல்லியிருப்பது 2008ல் நம்முடைய பிஸ்கல் பற்றாக்குறையை GDPயின் 3% மாற்றுவது. ஆனால், நமக்கான சாக்கு, உலகப் பொருளாதாரம் வீழ்ச்சியடைந்ததால் அதை செய்ய இயலாமல் போய்விட்டது. இப்போதும், பிரணாப் தா அடுத்த மூன்று வருட பிஸ்கல் பற்றாக்குறை எதிர்ப்பார்ப்பினை 4% கீழே வைக்கவே இல்லை என்பது குறிப்பிடத்தக்கது. சுருக்கமாய், நாம் இன்னும் நம்முடைய நிதி/பிஸ்கல் பற்றாக்குறையினை எக்செல் ஷீட்டின் எண்களாகப் பார்த்துக் கொண்டிருக்கிறோம். இதன் முக்கியத்துவத்தை யாரும் உணர்ந்ததாகத் தெரியவில்லை. இது ஒரு டைம் பாம். கடிகாரம் உள்ளே நிதானமாக, தொடர்ச்சியாக அதன் முடிவினை நோக்கி ஒடிக் கொண்டிருக்கிறது.

கறுப்புப் பணம். ஹசன் ஹலி பைஜாமா ஜிப்பாவில் மருத்துவமனையில் அரசியல்வாதிகள் மாதிரி உட்கார்ந்துக் கொண்டு பேட்டிக் கொடுக்கிறார். பிரணாப் தா வெளியே வந்து யார் யார் காசு வைத்திருக்கிறார்கள் என்கிறப் பட்டியலை அடுத்த வருடம் இறுதியில் தான் சொல்வோம் என்கிறார். கறுப்புப் பணத்தினை வெறும் அரசியல் கோஷமாக மாற்றி பாஜகவும் இன்னபிற கட்சிகளும் பேசிக் கொண்டிருக்கின்றன. காசு வந்தால், ஊரில் இருக்கும் எல்லாருக்கும் கலர் டிவி மாதிரி, இவ்வளவு பணம் கொடுக்கலாம் என்று கணக்கு போடுகிறார்கள்.முதலில் கறுப்புப் பணம் எப்படி வெளியேப் போனது என்று ஆராய வேண்டும். இப்போதும் எப்படிப் போகிறது என்று தெரிந்து அதன்மீது கடுமையான விதிமுறைகளை விதித்தல் வேண்டும்.

இந்தியாவுக்கு வரும் 42% முதலீடுகள் மொரிஷியஸ் வழியாகதான் வருகின்றது. அதில் எத்தனை நேர்மையான முதலீடுகள், எத்தனை தலை சுற்றி உள்ளே வரும் பணம் என்பதைப் பற்றிய அடிப்படை தகவல்கள் நம்மிடையே இல்லை. அதே சமயம், நமக்கு அன்னிய நேரடி முதலீடுகள் இல்லாமல் (FDI -Foreign Direct Investment) எதுவும் செய்யவும் இயலாது. அமெரிக்க சந்தைகள் மேலேப் போகின்றன. அமெரிக்க உள்நாட்டு முதலீடுகள் அதிகரித்து இருக்கின்றன என்று வால் ஸ்ட்ரீட் சொல்கிறது. ஆக, அமெரிக்காவிலிருந்து நாம் எதிர்பார்க்கும் அளவிற்கு முதலீடுகள் வரப் போவதில்லை. ஆக, கறுப்புப் பணம், முதலீடுகள் என்கிற இரண்டிலும் நம்முடைய பார்வை சரியானதாக இல்லை என்பது தான் நிதர்சனம்.

இப்போதைக்கு பட்ஜெட் சாதாரணர்களுக்கும், பல பொருட்கள் சார்ந்து பிரயோசனமாக இருந்தாலும், நீண்ட கால அடிப்படையில் நாம் இன்னமும் தயாராகவில்லை என்பது தான் கசப்பான உண்மை. இந்நிலையில், நம்முடைய எதிர்பார்ப்புகள் தொடர்ச்சியாக அதிகரித்துக் கொண்டேயிருக்கின்றன. இதை வரும் காலங்களில் நாம் எப்படி சமாளிக்கப் போகிறோம் என்பதில்தான் நம்முடைய எதிர்காலம் அடங்கியிருக்கிறது.

பொருட்காட்சிகளில் குழந்தைகளுக்கு ரங்க ராட்டினங்கள் ஆடக் கிடைக்கும். ஏறி உட்கார்ந்தால், சடாலென மேலேப் போய் எல்லாரும் துச்சமாய் தெரிவார்கள். ஆனால், சுற்று முடிந்தவுடன் நீங்கள் தரையில் தான் நடக்க வேண்டும். பிரணாப் ரங்க ராட்டின பட்ஜெட்டினை சமர்ப்பித்திருக்கிறார். நாம் இன்னும் மேலே சுற்றிக் கொண்டிருக்கிறோம். கீழே வரும் போது, யதார்த்தம் முகத்தில் அறையும். அதுவரை, நாம் சந்தோசமாய் தமிழகத் தேர்தல் பொய்மூட்டைகளைக் கேட்டு, டீக்கடையில் அரசியல் பேசி, விவாதித்து, சண்டைப் போட்டு, ஒய்ந்து இறுதியில் ஒட்டுப் போட்டு ஏமாறுவோம்.

நான் வசிக்கும் கே.கே. நகரில் 780 சதுர அடி அப்பார்ட்மெண்ட் எவ்வளவுப் போகுமென்று நினைக்கிறீர்கள் ? குறைந்தப் பட்ச விலை 40 இலட்சம். ஆனாலும், மூன்று மாதங்களுக்கு முன்பு, என்னுடைய அடுக்கக்கத்திலும், எங்களுக்கு முன்னால் இருந்த ப்ரீமியம் அடுக்ககங்களிலிருந்தும் அரதப் பழசான சட்டையைப் போட்டுக் கொண்டு, அரசு டிவியை வாங்கிக் கொண்டுப் போனார்கள் மக்கள். மக்களுக்கு டிவியின் மீதான் மோகம் அப்படி. டிவி இன்றைக்கு சாப்பாடு, உறைவிடம், உடை, செல்பேசி மாதிரி இன்றியமையாத சமாச்சாரம். ஆனால் அரசு கொடுக்கும் 14” டிவியிலா நாம் பார்க்கிறோம்? டிவிப் பார்ப்பது, டிவி வாங்குவது என்பது இந்தியாவின் சமுதாயப் பிரச்சனை. எதை வாங்குவது, எப்படி வாங்குவது, எங்கு வாங்குவது?

பிருஷ்டம் பெருசான போன தலைமுறை CRT (Cathode Ray Tube) கறுப்பு வெள்ளை/வண்ணத் தொலைக்காட்சிகள் வயதான கிழவிகள் போல ஒரங்கட்டப்பட்டு நாட்களாகின்றன. இப்போது தமன்னாப் போல சிலிம்மாகவும், சிலிர்ப்பாகவும் இருக்கும் எல் சி டி, எல் ஈ டி & ப்ளாஸ்மா டிவிகள் தான். இதன் கூடுதல் இணைப்பாக இப்போது எல் ஈ டி 3டி டிவிகள் வேறு சந்தையில். இதன் வித்தியாசங்கள், தொழில்நுட்ப சங்கதிகள், சுவாரசியங்கள் என்ன என்பது தான் இந்த வாரம்.

எல் சி டி டிவி (Liquid Crystal Display Tv)

எல் சி டி டிவிகள் போனத் தலைமுறை இண்டெல் பெண்டியம் கணினிகள் மாதிரியான ஆரம்ப விஷயம். இப்போதைய மடிக்கணினிகள், செல்பேசிகளின் திரைகள் எல் சி டிகள் தான். எல் சி டி டிவி என்பது CCFLகளின் அடிப்படையில் ஒளியினை பின்னாலிருந்து முன்னால் அனுப்பி இயங்கக் கூடிய சமாச்சாரம். ரொம்பவும் டெக்னிகலாய் படித்து விற்பனையாளனைக் கலாய்க்க, இங்கே விக்கிப்பீடியாப் பார்த்து ஜல்லியடியுங்கள்.(Cold Cathode Flourecent Lamps). டிவியின் காண்ட்ராஸ்ட் விகிதமைப் பொறுத்து தான் எல் சி டியும், எல் ஈ டியும் மாறும். 50000: 1 என்கிற பிக்சல் அளவுகோல், உங்களுடைய டிவியின் பளீச் பகுதி (Brightest spot) டிவியின் கரும்பகுதியை விட (Dark spot) 50000 மடங்கு பளீச்சென்று இருக்கும்.இப்போதைக்கு

எப்போது எல் சி டி டிவி போக வேண்டும்?

• உங்களின் திரை 42”க்கு குறைவாக இருந்தால்
• உங்கள் பட்ஜெட் எல் ஈ டிக்கு ஒத்து வரவில்லையென்றால்
• ஏற்கனவே உங்களுடைய வரவேற்பு அறையில் வெய்யில் நேரடியாக அடித்தால்

எல் சி டி பற்றி யோசியுங்கள். இல்லையெனில் நேரடியாக எல் ஈ டி போங்கள்

எல் ஈ டி டிவி (Light Emitting Diode Tv)

எல் ஈ டியும், எல் சி டியும் அடிப்படையில், நுட்பரீதியில் ஒன்றுதான். கிட்டத்திட்ட மாமம் மச்சான் உறவு.நுட்பம். வேறுபடும் இடம், ஒளி எப்படிப் பெறப்பட்டு, வெளீயிடப் படுகிறது என்பதில் தான் இருக்கிறது. எல் சி டியின் CCFL மாதிரி இல்லாமல், எல் ஈ டி டிவி, ஒளியினை OLED (Organised Light Emitting Diode) வழியாகப் பெறுகிறது. வித்தியாசம், படம் துல்லியமாகவும், தெளிவாகவும் இருக்கும். பின்புற ஓளியலைகளால் உருவாவதால், அதன் உருவம் எல் சி டியை விட மெல்லியதாக செய்ய முடியும். எல் ஈ டியில் இரண்டு வகை உண்டு. பின்புற ஒளிக்குவியல் எல் ஈ டி(backlit LED TV) மற்றும் ஒரக் குவியல் எல் ஈ டி(Edgelit LED). இரண்டிலும், பெயர்களுக்கு ஏற்ப, பின்னாலிருந்தோ, ஒரங்களிலிருந்தோ ஒளிப் பாயும். ங்கே எல் சி டியை விட எல் ஈ டியை தேர்வு செய்வதற்கான முக்கியமான காரணம், இதற்கான மின் தேவைகள் குறைவு.

எப்போது எல் ஈ டி போகலாம்?

• உங்களுக்கு தமன்னாவை விட மெல்லிய உருவ அமைப்போடு டிவி வேண்டுமானால்
• உங்களின் கார்பன் குவியலைப் பற்றி கவலைப்பட்டால்
• உங்கள் மின் கட்டணம் 30-40 குறைவாய் செலவு செய்ய விருப்பப்பட்டால்
• சின்ன டிவியாய் இருந்தாலும், காண்ட்ராஸ்ட் விகிதம் அதிகமாய், எஃப் டிவி துல்லியமாய் தெரியவேண்டும் என்று நினைத்தால்
• பர்லிலோ கிரெடிட் கார்டிலோ நிறையத் தேய்க்க முடிந்தால்

எல் ஈ டி பற்றி விரிவாய் தெரிந்துக்கொண்டு, வாங்குங்கள்..

ப்ளாஸ்மா டிவி (Plasma Tv)

மேலே சொன்ன இரண்டு நுட்பங்களை விட கொஞ்சம் சிக்கலானது ப்ளாஸ்மா. ஆனால், பட துல்லியம் அபாரமாய் இருக்கும். க்ளோசப் ஷாட்டில், ஷேவ் செய்தபின் லேசாய் தெரியும் பச்சை நரம்புகள் கூட தெளிவாய் திரையும் தெரியுமளவிற்கு அசாதாரணமான துல்லியத்தோடு இருக்கும்.

ஆரம்பமே, இதன் காண்ட்ராஸ்ட் விகிதம் சில மில்லியன்களில் தான் ஆரம்பிக்கும். (எல் சி டி, எல் ஈ டி சில ஆயிரங்கள் தான் என்பதை நினைவில் கொள்க) இதன் நுட்பம் மேற்சொன்ன இரண்டையும் விட வேறானது; சிக்கலானது. ப்ளாஸ்மா, செனான் மற்றும் நியான் மூலக்கூறுகளை உள்ளடக்கியது. ஏழாம் வகுப்பில் படித்த பாரடே கொள்கைகள் தெரியாமல், ப்ளாஸ்மா புரியாது. சுருக்கமாய், மின்சாரம் இந்த மூலக்கூறுகளின் மீது பாய்ந்தால், இவை பளிச்சென ஒளியினை உமிழ்ந்து, போட்டான்களை வெளியிட்டு, திரையின் காட்சியினை மில்லியன் துகள்களாக வெளியிட்டு மூன்றாவது அம்பயர் பதில் சொல்வதற்கு முன் நாமே கரித்துக் கொட்ட வசதியாய், பிக்சல் இடைவெளியில்லாமல் காட்டும். மேலே சொன்னது மிக எளிமைப் படுத்தி விளக்கமுயன்றது. புரிய வில்லையென்றால், சுஜாதாவின் ஆவிக்கு ட்ரங்கால் அடிக்கவும் இல்லை இங்கேப் பார்க்கவும்.

எப்போது ப்ளாஸ்மா வாங்கலாம்?

• உங்களின் தேவை 42” க்கு மேலே இருந்தால்
• வேகமாய் நகரும் படங்கள் அதிகமாய் பார்த்தால் உ.தா F1 ரேஸ், டிஸ்கவரியில் பாம்பு தவளையைக் கவ்வுதல் அல்லது ரஜினிப் படம் பார்த்தல்
• சினிமா ரேஞ்சுக்கு பீலாகி படம் பார்க்க நினைத்தால்
• டிவிக்கென்று தனியறை இருந்து, இருட்டில் படம் பார்க்க நினைத்தால்
• சொத்து நிறைய இருந்தால்

இது தாண்டி, எச்.டி டிவி, 3டி எல் ஈ டி, பின்னாலிருந்து திரையில் உமிழும் (rear projection) டிவி என கொஞ்சம் ஸ்டார் ஹோட்டல் வகையறாக்கள் இருக்கின்றன. இப்போதைக்கு அதுத் தேவையிலை.

டிவி வாங்கியாகி விட்டது. இப்போது அடுத்தப் பிரச்னை, எவ்வளவு தூரத்தில் இருந்து டிவி பார்ப்பது?

மேலே சொன்ன எல்லா வகையறாக்களிலும் பிக்சல் துல்லியத்தோடு படம் தெரிவதால் ரொம்ப கிட்டத்திலிருந்து பார்த்தால், பழைய கறுப்பு வெள்ளை டிவி மாதிரி கட்டங்கள் தெரியாது. ஆனாலும், கண்ணாடிப் போடுபவர்களின் எண்ணிக்கை அதிகரித்து இருப்பதால், கொஞ்சம் தள்ளி நின்று டிவிப் பார்க்கலாம்.

நீங்கள் என்ன சைஸ் டிவி வாங்குகிறீர்களோ, அதிலிருந்து குறைந்தப்பட்சமாய் 1.5 மடங்கும், அதிகப்பட்சமாய் 2 மடங்கும் எடுத்துக் கொண்டு, அங்கே உங்கள் சோபாவினைப் போடுங்கள். உதாரணம், நீங்கள் 42” டிவி வாங்கினால் அதன் 1.5 மடங்கு (63”) / 2 மடங்கு (84”) தூரத்தை இஞ்சிலிருந்து அடியாய் மாற்றுங்கள். (ஒரு இஞ்ச் = 0.0833333333 அடி) இப்பொது வருவது குறைந்தப்பட்சம் 5.25 அடி / அதிகப்பட்சம் 7 அடி. இதை தான் உலகமெங்கும் சரியான பார்வையிடமாகச் சொல்கிறார்கள். இதற்கு நடுவில் சோபாவைப் போட்டு, சத்தம் அதிகம் வைக்காமல், எல்லாரும் தூங்கியபின் மிட் நைட் மசாலா பார்க்கலாம்.

மேலே சொன்னது டிவி வகையறா மற்றும் டிவி பார்த்தலின் அடிப்படை. இதிலேயே ஆயிரத்தெட்டு சூட்சுமங்கள் இருக்கின்றன. அதை இங்கே எழுத முடியாது. வேண்டுமானால் “டிவி வாங்குவது எப்படி?” என்று புத்தகமெழுதலாம். நான் ரெடி, கிழக்கு ரெடியா?

பார்த்திபன், கவுண்டமணி நடித்தப் படம். இரண்டு பேரும் சிறு திருடர்கள். ஏதோ ஒரு குற்றத்திற்காக போலீஸ் பிடித்துக் கொண்டுப் போய் அடித்து, இவர் மேல் நான்கு வழக்கு, அவர் மேல் நான்கு வழக்கு என்றுப் போடுவார்கள். அப்போது கவுண்டமணி கேட்பார் ‘ஹவாலான்னா என்னவே?’ அதற்கு அந்த காவலர் ‘லே அது அன்னியச் செலவாணி மோசடிலே’ எனப் பதில் கூற, அதற்கு கவுண்டமணியின் கவுண்டர் பஞ்ச் ‘ம்ஹ்ம், நாங்க உள்ளூர் செலவுக்கு வக்கிலாமதான் திருடறோம், இதுல அன்னிய செலவாணி வேறயா’ என்பார்.

அன்னிய செலாவணி, பெமா (FEMA), பெர்ரா (FERA) மாதிரியான வார்த்தைகளை நாம் 90களின் பிற்பகுதியில் இருந்துப் படித்து வருகிறோம். ஏற்றுமதியை முக்கியமாகக் கொண்ட நகரங்களில் திருப்பூரும் ஒன்று. வருடா வருடம் தீபாவளி, பொங்கல் போல, திருப்பூரில் ஏதாவது ஒரு டூபாக்கூர் பாரெக்ஸ் (Foreign Exchange சுருக்கமாய் ForEx)கம்பெனி ஏமாற்றி ஒடிப் போவார்கள். 2009ல் நடந்த கதையில் போனது ரூ.50 கோடி. முட்டாள் ஜனங்களுக்கும், பேராசைப் பிடித்துத் தொடர்ச்சியாக ஏமாறுவார்கள்.

திருப்பூர் மாதிரியான ஊர்களில் இந்தப் பாரெக்ஸ் நிறுவனங்கள் கடைப் பரப்பி, கல்லாக் கட்டி ஒடுவதற்கான முக்கியமான காரணம் Currency futures பற்றிய அடிப்படை அறிவு இல்லாதது தான். ஆனால், வெள்ளையன் மாதிரியான சங்கத் தலைவர்கள் யூகப் பேர வணிகம்தான் (Futures & Options) பொருட்களின் ஒட்டுமொத்த விலையேற்றத்துக்குக் காரணம் என்று கொடிப் பிடித்து, போராட்டம் நடத்தி, அரசியல் ரீதியாக பயமுறுத்தி அடிப்படையான விஷயத்தினை மறக்கடிப்பார்கள். மக்களும் ஆமாஞ்சாமிப் போட்டு, கடைசியில் ‘டாலர்லப் போட்ட ஒரே மாசத்துல 10000ரூபாய்க்கு ரூ.1000 தராங்களாம், வேற எவன் கொடுப்பான்’ என்று லட்சலட்சமாய் காசைக் கொட்டி, கமிஷனர் ஆபிஸில் புலம்பி, பனகல் பூங்காவில் சங்கம் அமைத்து காத்திருப்பார்கள்.

அலுவலகம் போட்டு ஆசைக் காட்டி ஏமாற்றும் கும்பல் ஒரு பக்கமென்றால், இணையத்தில் இந்த பாரெக்ஸ் கும்பல் பண்ணும் அட்டகாசம் இன்னும் அதிகம். உதாரணம் – இந்த ஆஸ்திரேலிய நிறுவனம். அதன் முதல் பக்கத்தில் 400:1 leverage என்றுச் சொல்கிறது. இந்த மாதிரி லெவரேஜெல்லாம் பண்ணி சம்பாதிக்க முடியுமென்றால், முகேஷ் அம்பானி தன் வாழ்நாள் சம்பாத்தியத்தை பாரெக்ஸில்தான் போட்டிருப்பார். புதையலில் கூட இவ்வளவு ’மல்டிப்பிள்’கள் பார்க்கமுடியாது.

பிதாமகனில் லைலாவை ஏமாற்ற சூர்யா ’லங்கர்’ஆடுவார். லங்கர் ஆட்டம் பார்த்திருப்பீர்கள். முதலில் நடத்துபவர் ஆடுவார். நீங்கள் பந்தயம் வைப்பீர்கள். ஜெயிப்பீர்கள். பின் அவரே உங்களிடம் கொடுத்து உருட்டச் சொல்வார். நீங்கள் உருட்ட உருட்ட எதுவும் நீங்கள் எதிர்ப்பார்த்த மாதிரி வராது. படுநியாயவான்களாக உங்களை ஏமாற்றி, இடத்தை மாற்றிக் கொண்டு போய்க் கொண்டே இருப்பார்கள். பாரெக்ஸ் சந்தைகள் என்று இணையத்தில் புழங்குவது எல்லாமே இந்த மாதிரியான லங்கர் ஆட்டம் தான். கொடுப்பதுப் போலக் கொடுத்து மொத்தத்தையும் பிடுங்கி நடுத்தெருவில் நிற்க வைத்துவிட்டுத் தான் மறுவேலைப் பார்ப்பார்கள். 400 மடங்கு லெவரேஜ் எல்லாம் சாதாரணம். காசா, பணமா. நிஜத்தில் அவ்வளவு லெவரேஜ் சாத்தியமா?

இந்தியாவில், ரிசர்வ் வங்கி அனுமதித்திருப்பது 20 மடங்கு லெவரேஜ் தான். பெரும்பாலானவர்கள் இது அங்கீகாரம் பெற்றது என்று கதைவிடுவார்கள். ரிசர்வ் வங்கியே $200,000 (90 லட்சம்) வெளிநாடுகளில் முதலீடு செய்யலாமென்று சொல்லியிருக்கிறது என்று ஒரு பட்டியலைக் காட்டுவார்கள். சூட்சுமம் என்னவென்றால், ரிசர்வ் வங்கி அனுமதித்து இருப்பது முதலீடு செய்வதற்கு மட்டுமே (வீடு, பங்குச்சந்தை முதலியன). ஆனால் பாரெக்ஸ் வர்த்தகம் என்பது மார்ஜினை பயன்படுத்திச் செய்வது. இது அனுமதிக்கப்படவில்லை & கிரிமினல் குற்றம். இந்த மாதிரி படங்காட்டி போன மாதம் நொய்டாவில் ஒரு பாரெக்ஸ் நிறுவனம் மக்களைப் போண்டியாக்கி இருக்கிறது. எண்ட்மார்க்ஸ் பாரெக்ஸ் என்கிற நிறுவனத்தில் காசுப் போட்டவர்கள் இங்கே புலம்பித் தள்ளி, போட்டக் காசு திரும்ப வரவழிகிடைக்காதா என்று காத்திருக்கிறார்கள். இந்தியாவில் எல்லா இடங்களிலும் இவர்கள் கடை விரிப்பார்கள்; இனிக்க இனிக்கப் பேசுவார்கள்; மக்களும் ஏமாறுவார்கள்;கல்லா கட்டியதும்’எஸ்’ஸாவார்கள்.

லெவரேஜின் அடிப்படைப் புரியாமல் இது புரியாது. 2008 அமெரிக்க சப்-ப்ரைம் பிரச்சனையும் இந்த மாதிரி லெவரேஜ் சமாச்சாரத்தில்தான் ஆரம்பித்தது. ஆனால், அங்கேக் கூட 400 மடங்கு லெவரேஜ் எல்லாம் சாத்தியமில்லை. அடிப்படையில் லெவரேஜ் என்பதே ஒரு மோசமான விஷயம். உங்கள் கையில் வெறும் ரூ.100 இருக்கிறது. நீங்கள் எப்படி ரூ.1000 மதிப்புள்ள (10 மடங்கு லெவரேஜ்) பொருளை வாங்க முடியும்? இதுதான் அடிப்படை. வங்கிகள் கடன் கொடுப்பது இதில் சேராது. அது நீண்டகால ரிஸ்க் லெவரேஜ் சமாச்சாரம். ஆனால் குறுகியக் காலத்தில் 400 மடங்கு லெவரேஜ் என்பதெல்லாம், குட்டிச்சுவராகி காணாமல் போவதின் உடனடிக் குறுக்குவழி.

இந்த எத்தர்கள் எப்படி மக்களை ஏமாற்றுகிறார்கள் என்பது தெரியவேண்டுமானால், உண்மையில் பாரெக்ஸில் இந்தியாவில் என்ன நடக்கிறது என்கிற அடிப்படைத் தெரிய வேண்டும்.

இந்தியாவில் 4 இணைகள் (pair) தான் இப்போதைக்கு பாரெக்ஸில், கரன்சி ப்யூச்சரில் செய்ய முடியும்.

1. அமெரிக்க டாலர் / இந்தியரூபாய் (Dollar/Rupee)
2. இந்தியரூபாய்/யூரோ/இந்தியரூபாய் (Euro/Rupee)
3. பவுண்ட்/இந்தியரூபாய் (Pound/Rupee)
4. ஜப்பானிய யென்/இந்தியரூபாய்

இது தவிர வேறெந்த நாட்டின் பணத்தையும் இந்தியாவில் பண்ணமுடியாது. குறைந்தப் பட்சமாக $1000, Euro 1000, £1000 மற்றும் ¥100,000 காண்ட்ராக்ட் இருக்க வேண்டும். அதிகப் பட்சமாக 12 மாதங்கள் ஒப்பந்தம் போடலாம். குறைந்தப் பட்ச விலை ஏற்ற இறக்கங்கள் (Tick Size) 0.25 பைசாவாக இருக்க வேண்டும். இதுவும் அரசு அங்கீகாரம் பெற்ற தரகு நிறுவனங்கள் வழியே மட்டுமே செய்ய இயலும். நாளைக்கு Narain & CO என்று யாராவதுப் பெயரைப் போட்டு திர்ஹம், சிங்கப்பூர் டாலர்கள், ரஷ்ய ரூபிள்கள், சீன ரென்பிகள் என்று படங்காட்டினால் நம்பாதீர்கள். அது டூபாக்கூர்களுக்கு மட்டுமே சாத்தியம்.

உலகில் எந்த வணிகத்திலும் வாரத்துக்கு 3%வும், மாதத்துக்கு 10% வளர்ச்சியும் நடக்காது. அது நடந்தால், உலகமுழுவதும் அந்த வணிகத்தில் ஒரே நாளில் இறங்கி அந்த வணிகத்தின் லாப விகிதத்தினைக் குறைத்துவிடுவார்கள். இப்போதைக்கு இந்த சாத்தியங்கள் ஒரே ஒருத் துறையில் மட்டுமே உண்டு – ஹை ப்ரீக்வென்சி ட்ரேடிங் (High Frequency Trading – HFT). இதை வைத்துக் கொண்டுதான், ’கோல்ட்மென் சேக்ஸ்’மாதிரியான நிறுவனங்கள், மண்டியிட்டு அரசுப் பணத்தை வாங்கிக் கொண்டு, சடாலென ஒரே வருடத்தில், ஒவ்வொரு காலாண்டிலும் பில்லியன் டாலர்களில் லாபம் காட்டி, வால் ஸ்ட்ரீட் ஜர்னலிலும், ப்ளூம்பெர்க்கிலும் சிரித்துக் கொண்டு போஸ் கொடுகிறார்கள். அதுவே ஒரு நுட்ப சூதாட்டம் என்று விவாதம் ஒடிக் கொண்டிருக்கிறது. அது வேறு கதை. இப்போதைக்கு, அது மாதிரி யாராவது சொன்னால், மொன்னையாய் சிரித்து விட்டு இடத்தை காலிப் பண்ணுங்கள். அந்த நபர்/நிறுவனம் இருக்கும் திசைக்கு ஒரே கும்பிடாய் போட்டு, சன் டிவியில் சீரியல் பாருங்கள்.

டூபாக்கூர் பாரெக்ஸ் நிறுவனங்களை கண்டறிவது எப்படி?

1. இவர்கள் பெரும்பாலும் இந்தியாவுக்கு வெளியில் இருப்பார்கள். இந்தியாவில் அலுவலகம் என்கிற ஒரு விஷயமிருக்காது. இவர்கள் பரிவர்த்தனை செய்வதாகச் சொல்லும் வழிமுறைகள் எல்லாமே இணையவழி wire transferகளாக இருக்கும்.
2. உங்களின் பரிவர்த்தனைகள் அனைத்தும் உங்களின் டெபிட்/கிரெடிட் கார்டுகள் வழியே நடக்கும். இந்தியாவில் எந்த வங்கிகளோடும் தொடர்பு இருக்காது. செக், டிடி, இந்திய இணையப் பரிவர்த்தனை எல்லாம் நடக்காது. இரண்டு மூன்று வாரங்கள் காசு வருவதுப்போல வந்து, உங்களை அதிகமாக முதலீடு செய்ய சொல்லி, வழித்து நக்கிவிடுவார்கள்
3. இந்தியரூபாயில் எவ்விதமான இணைகளும் இருக்காது. காரணம் கேட்டால், உலக அரசியல் பேசுவார்கள். நாளைக்கான ’டிப்’பில் ஹோஸ்னி முபாரக் ஒடிப் போனதால் எகிப்திய குறையும், அதனால் அமெரிக்க டாலர்களாக வாங்கிப் போடுங்கள் என்று குருட்டாம்போக்கில் வழிக் காட்டுவார்கள்.
4. இவர் $1000 போட்டு ஒரே மாதத்தில் $5000 சம்பாதித்தார் என்று சொல்வார்கள். ஆனால் போட்டோப் போட்டு, கீழே இருக்கும் பெயரைத் தவிர வேறெதுவுமிருக்காது. இதெல்லாம் தமிழ் சினிமாவின் சிவாஜி கால டெக்னிக்.
5. ரிசர்வ் வங்கி என்றைக்கும் காசைக் கொண்டுப் போய் இணைய வழி பாரெக்ஸ் டூபாக்கூர்களில் போடச் சொல்லவில்லை. $200,000 வெளிநாடுகளில் முதலீடுச் செய்யலாம் என்பது பாரெக்ஸுக்கு பொருந்தாது.
6. இந்தியாவில் வெளிநாடுகளிலிருந்து உங்களின் வங்கியினைத் தவிர வேறு வழிகளில் வரும் பணம் எதுவும், அரசுக்கு ஒப்புதல் இல்லை. கொஞ்சம் காட்டமாகச் சொன்னால், தேசத் துரோகக் குற்றம். உலகமெங்கிலும் பெரும் பேர் பெற்றாலும், ’பேபால்’ இந்தியாவில் சிங்கியடிக்கிறது. நம்முடைய ரிசர்வ் வங்கி விதிமுறைகள் அப்படி.
7. கொஞ்சம் ‘பீட்டர்’த்தனமாய் யாராவது எதையாவது சொல்லி, கூகுள் தரவு எல்லாம் கொடுத்தால் உடனே நம்பிவிடாதீர்கள். இணையம் அரிச்சந்திரனின் அரண்மனையல்ல. நிஜத்தினை விட நிஜம் போலிருக்கும் பொய்கள் தான் அதிகம். கூகுளை கடவுளாய் மாற்றி, சொல்வதையெல்லாம் நம்பாதீர்கள். நான் கூட கூகுள் AdWordsல்,‘சச்சின் தெண்டுல்கர்’ இந்திய சித்தர் பரம்பரையில் ஒருவர் என்று சொன்னால் காசு வாங்கிக் கொண்டு அதையும் போடுவார்கள். இணையத்தில் இருப்பதனாலேயே ஒரு விஷயம் உண்மையல்ல.

இந்த அபத்தம் முழுமையாய் புரியவேண்டுமானால், சேப்பாக்கம் மைதானத்தில் பின்புறக் கேட்டுக்கு எதிரே சி.என்.கே சாலை என்று ஒரு தெரு இருக்கிறது. வெறும் மேன்ஷன்களாக இருக்கும் பிரதேசமது. அங்கே இந்தமாதிரி 100 பேர்கள் சுற்றிக் கொண்டிருக்கிறார்கள். மெயின் ரோட்டில் இருக்கும் கடையில் உட்கார்ந்துக் கொண்டு, டீ வாங்க காசில்லாமல், வெறும் ஜெராக்ஸ் பிரதிகளாக கையில் $100 மில்லியனிலிருந்து சில பில்லியன் வரைக்கும் வைத்துக் கொண்டு, காற்றிலே கணக்குப் போட்டுக் கொண்டு ‘நீங்க மட்டும் ரெடின்னு சொல்லுங்க சார், ஆளை நான் மொரிஷியஸ்ல இருந்து நாளைக்கேக் கொண்டு வந்து நிப்பாட்டறேன்’ என்பார்கள். ஒரு தடவை அந்த திருத்தலத்துக்கு தீர்த்தயாத்திரைப் போனால், கலக்கம் தெளிந்து, காசை வைப்பு நிதியில் போட்டு வேர்ல்ட் கப் பார்ப்பீர்கள்.

ஒரு வழியாகப் புதிய நெட்புக் ஒன்றினை வாங்கினேன். இந்தக் கணினி வாங்குதலில் எப்போதுமே குழப்பமிருக்கும். கார் வாங்குவதைப் போல. அவரவர்கள் அவரவர்களின் விருப்பு வெறுப்புகளை நம்மீது திணிப்பார்கள். ‘பொண்ணு +1 படிக்கிறா, அவளுக்கு ஒரு கம்ப்யூட்டர் வாங்கனும். கெட்ட விஷயமெல்லாம் நிறைய இருக்காமே, அதெல்லாம் இல்லாம வாங்கணும்’ என்பதில் ஆரம்பித்து, ‘டெல் 14.1”க்கும் எச்.பிக்கும் இருக்கிற மேஜர் வித்தியாசம், அகலவாக்குல டெல் 1.5 செ.மீ அதிகம்” என்று அலப்பும் நுட்ப ஜிகினாக்களுக்கும் நடுவே தான் நம்முடைய வாய்ப்புகள் இருக்கின்றன. ஹைப்பர் மார்க்கெட்டில் கிடைக்கும் 56 வகையான சோப்பில் எதை எடுப்பது என்கிற வீட்டுக்காரம்மாவின் குழப்பத்திற்கு ஈடானது தான், எதை வாங்குவது என்பது?

பொதுவாகவே நமக்கு அடுத்தவீட்டுக்காரன் என்ன செய்கிறான் என்பதில் இருக்கும் ஆர்வம், அதன் மூலமாக எழும் பொறாமை, ஆசை, பேராசையில் தான் பல முடிவுகள் தவறாக எடுக்கப்படுகின்றன. கணினியில் இயங்கும் நிறைய பேர்களுக்கே, எதை வாங்க வேண்டும், எது தமக்கு தேவை என்பதில் தெளிவில்லை. போனவாரம், QR கோடில் கொஞ்சம் மண்டை குழம்பியதால், இந்த வாரம் லைட்டாக கணினி வகைகள், பயன்பாடுகள், யாருக்கு எது தேவை என்பதைப் பார்ப்போம்.

தொழில்நுட்பம் அரபிக்குதிரைப் பாய்ச்சலில் ஒடிக் கொண்டிருக்கும் காலக்கட்டமிது. நாளுக்கு ஒரு மாடல், வருடத்திற்கு ஒரு புதிய இயங்குதளம், அதிவேக சாத்தியங்கள் என்று டொர்னேடோ சூழலில் சிக்கித் தவிக்கிறது கணிமையுலகம். தற்போது ஸ்மார்ட் போன்களையும் சேர்த்து 5 விதமான வகைகள் நமக்கு இருக்கிறது.

• மேசைக்கணினி (Desktop PC)
• மடிக் கணினி (Laptops)
• குறுங்கணினி (Netbooks)
• தொடுதிரை சிலேட்டுகள் (Tablets)

மேசைக் கணினி / Desktop PC

இதைத் தமிழில் மேசைக்கணினி என்று மொழிபெயர்த்திருக்கிறார்கள். மேசைக்கணினி, நாற்காலிக் கணினி, சைக்கிள் கேரியர் கணினி என்பதிலெல்லாம் எனக்கு உடன்பாடில்லை. ஆரம்ப நாளில் ஒரு அறையினை அடைத்துக் கொண்டு ஆக்ரமித்துக் கொண்டிருந்த கம்யூட்டர் என்கிற சமாசாரத்தை டேபிளின் மீது அடக்கக்கூடிய வகையில் மாற்றி அமைத்ததில்தான் பில்கேட்ஸ் பில்லியனரானார். இன்றைக்கு வரைக்கும் மேசைக்கணினியின் வேகம் பிற வகையில் இல்லை என்பது தான் உண்மை.

இண்டெலும், ஏ.எம்.டியும் போட்டிப் போட்டுக் கொண்டு சிலிக்கான் சில்லுகளை பதித்து, வேகத்தைக் கூட்டி, உலகத்தை தலைகீழாகப் புரட்டிப் போட்டு 20 வருடங்களாகின்றன. இன்றைய செல்பேசியின் வேகம் கூட ஆரம்பக் கால 80களின் கணினியில் இல்லை என்பது தான் நிஜம். இப்போதைக்கு அதி வேகமான மேசைக் கணினிகளைக் கொண்டு என்ன வேண்டுமானாலும் செய்யலாம். பல தொழில்கள் இணையத்தில் சுருங்கியதற்கு காரணம் இதுதான்.

அதிகமான செயல்திறனும், வேகமான இடையூடாலும் தேவைப்படும் எல்லாத் தொழில்களுக்கும், இன்னமும் மேசைக் கணினி தான் சிறந்தது. கிராபிக்ஸ் வேலைகள், CAD/CAM வரைப்படங்கள், பெரும் ப்ராசஸிங் தேவைப்படும் விஷயங்கள், கட்டிட வரைப்படங்கள், தட்பவெப்பநிலை சமாச்சாரங்கள் என processor intensive விஷயங்கள் அனைத்திற்கும் மேசையே மேல்.

இது தாண்டி, சீரியல் பார்த்த பாக்கி நேரத்தில் வெட்டியாய் இருக்கும் மக்கள், வீட்டிலிருந்தப்படியே பல்வேறு விதமான வேலைகளில் ஈடுபடவும் மேசைக்கணினியே சாஸ்வதம். பங்குச்சந்தையில் பங்குப் பெறலாம்; டேட்டா எண்ட்ரி அடிக்கலாம்; ஈ பேயில் பொருட்கள் வாங்கி விற்கலாம்; குரூப்பானின் குளோன்களில் பொருட்கள் வாங்கி அடுக்ககத்தில் அடுக்கலாம்; கொஞ்சம் சாமர்த்தியமும், தேடலும் இருந்தால், வீட்டிலிருந்தே ஆராய்ச்சிப் பணிகளுக்கு உதவலாம்; எடிட்டிங் செய்யலாம்; ட்யூஷன் எடுக்கலாம்; ஆலோசனைகள் தரலாம்.

தற்போதைய நிலைமை:

இண்டெல் கோர் 2 டியோவிலிருந்து ஐ3 – ஐ5 வரைக்கும் போயாயிற்று. சராசரியாய் 2ஜிபிலிருந்து 4ஜிபி வரைக்கும் ரேம் கிடைக்கும். 1டிபி வரை ஹார்ட் டிஸ்க் கிடைக்கிறது. மேற்சொன்ன விஷயங்கள் செய்யவில்லையெனில், மேசைக்கணினி போவது வீண்.

மடிக் கணினி / Laptops

மடிக் கணினி என்றால் ஆசாரமான கணினி என்றுப் பொருளோ என்னவோ. 2004க்கு பிறகுதான் இந்தியாவில் மடிக்கணினியின் பெருக்கம் அதிகரித்தது. இன்றைக்கு எல்லா தொழிலதிபர்களும் காதில் போனோடும், மேசையில் மடிக்கணினியோடும் போஸ் கொடுக்கிறார்கள். 80களில் டேபிளில் இருந்த மூவர்ண போன்களுக்கு பதில் இப்போது லேப்டாப்.

லேப்டாப் இன்னமும் தமிழ் சினிமாவில் செட் ப்ராப்பர்டி தான். ஆனால், கடந்த ஆறு வருடங்களில் லேப்டாப் அமிர்தாஞ்சனின் நெற்றி போல எல்லா இடங்களிலும் பரவியிருக்கிறது. இன்றைய லேப்டாப்கள் கிட்டத்தட்ட பெரும் வேலைகள் செய்யக் கூடிய அளவுக்குத் திறன் படைத்தவை. அதே சமயத்தில் அதன் எடையும் அதற்கேற்றாற் போல கூடுவதும், அதன் பேட்டரி தன் திறனை இழப்பதும் கூடவே நடக்கிறது. பெரும்பாலானவர்கள், லேப்டாப் வாங்கவேண்டுமே என்று வாங்கி விட்டு, பின் அதை நித்திய கர்ப்பிணி மாதிரி முதுகில் சுமந்து கொண்டு திரிகிறார்கள். கங்காருவுக்கும் மென்பொருள் ஆசாமிக்கும் இருக்கும் ஒரே விஷயம், கங்காருவின் பை முன்னால், மென்பொருள் ஆசாமிக்கு பின்னால்.

இணையத்தில் உலாவுதல், மடல்கள், ஆபிஸ் சமாசாரங்கள், எம்பி3 கேட்டல், யூட்யூப் பார்த்தல், டொரண்டுதல், ஒரளவிற்கு டெஸ்க்டாப் செய்யும் வேலைகள் அனைத்தையும் செய்தல், போன் பேசுதல், VOIPயில் உலகத்தோடு ஒட்ட ஒழுகல், ட்வீட்டும், ஃபேஸ்புக்குமாய் குடித்தனமிருத்தல், சந்தடி சாக்கில் கேப் கிடைத்தால் ஆட்ரினா லிமாவின் ஆட்டங்களைப் பார்த்தல் என்பதற்கெல்லாம்.லேப்டாப் போதும். அமெரிக்க/ ஐரோப்பிய/ வளைகுடா ரிடர்ன் என்பதாலேயே வீட்டிலிருக்கும் பெரியவர்களுக்கு லேப்டாப்பினைக் கொண்டு வராதீர்கள். பெரியவர்களின் கை அழுந்தாது. அவர்களுக்கு டெஸ்க்டாப் விசைப் பலகைத் தான் சரி. அதைப் போல லேப்டாபின் வீல்கள், தடவல்கள், ரைட் கிளிக் சமாசாரங்கள் சரிப்படாது. அவர்களுக்கு மேசைக்கணினி தான்.

தற்போதைய நிலைமை

12.1”ல் ஆரம்பித்து கிட்டத்திட்ட 19” வரைக்கும் லேப்டாப்கள் கிடைக்கின்றன. பேட்டரியின் சராசரி நேரம் 2.5 மணி நேரங்கள். இண்டெலின் கோர் 2 டியோவிலிருந்து ஐ3 சீரிஸ் வரைக்கும் கிடைக்கிறது. ரேம் 2-3ஜிபி அதிகப்பட்சமாய். ஹார்ட் டிஸ்க்: 320ஜிபி வரை

முக்கியமாய் பார்க்க வேண்டியது

பேட்டரி நிற்கும் திறன், விசைப் பலகையின் பழகுத் திறன், மடியிலோ, மேசையிலோ வைத்தால் எழும் வெப்பம், உள்ளே பேன்கள் சுழலும் சப்தம், ஆன்/ஆப் ஸ்விட்ச் இருக்கும் இடம்

குறுங்கணினி / Net books

முதல் பேராவில் சொன்ன குறுங்கணினி தான் நான் வாங்கியது. குறுங்கணினிகள் என்பவை 2007க்கு பிறகான சமாசாரங்கள். குறுங்கணினிகள் என்பவை எப்போதும் பறந்து கொண்டே இருப்பவர்களுக்காகவும், எந்நேரமும் காரிலேயே ஒடிக் கொண்டிருப்பவர்களுக்குமானது. முக்கியமாக, இணையத்திலேயே பெரும் பணிகளைச் செய்பவர்களுக்கானது.

லேப்டாபின் எல்லா விதமான சாத்தியங்களும் இன்றைக்கான குறுங்கணினியில் இருக்கிறது. டிவிடி ப்ளேயர் கிடையாது. அதனால் எடைக் குறைவு. வெறும் 1கிலோ.

வெறுமனே “ஐயன்மீர் என்று ஆரம்பித்து, நன்றியுள்ள” என்று முடிக்கும் ஆபிஸ் கடிதங்கள், எக்ஸெல் தாள்கள், படங்காட்டும் பிரசண்டேஷன்கள், இணைய உலாவல், பாட்டுக் கேட்டல், யூட்யூப் வீடியோக்கள், மடல்கள் என்று உங்கள் தொழில் இருந்தால், உங்களின் லேப்டாப்பினை யாராவது ஏமாந்த சோணகிரிக்குக் கொடுத்து விடுங்கள். உங்களுக்கு குறுங்கணினி போதும். எழுத்தும், கொஞ்சமாய் கிராபிக்ஸும் மட்டுமே இருப்பின் குறுங்கணினியைத் தவிர வேறெதுவும் தேவையில்லை. நான் குறுங்கணினிக்கு மாறியதற்கு காரணமும் இதுதான். நம்முடைய வேலை என்ன என்பதில் தெளிவு வந்துவிட்டால், தேவையில்லாத விஷயங்களை வாங்குவதைக் குறைக்கலாம்.

டிவியின் காண்ட்ராஸ்ட் ரேஷியோவும் கணினிகளின் ரேஷியோவும் வெவ்வேறு. ப்ளாப்பி ஒழிந்தது போல, டிவிடியும் ஒழிந்தது. ஆனால், மீண்டும், மீண்டும் நாம் டிவிடியும், சினிமாவும், இன்னபிறவையும் பிடித்துத் தொங்கிக் கொண்டிருந்தால், கஷ்டம். என்னதான் டொரண்டிப் பார்த்தாலும், 5.1 ஸ்ட்ரீயோ, HD தரம் கணினியில் வருவது கடினம். ஆகவே செலவோடு செலவாக ரூ.3,000 கொடுத்தால், அற்புதமான 5.1 ஸ்ட்ரீயோ டிவிடி ப்ளேயர் ரெடி. அந்த ஒரு காரணத்துக்காக லேப்டாப்பையும் டெஸ்க்டாப்பையும் வாங்கி வைப்பது மடத்தனம்.

இன்றைய நிலைமை

இண்டெல் ஆடம் ப்ராசசரும், குறைந்த பட்சம் 2ஜிபி டிடிஆர் 2 ரேமும் அதிக பட்சமாக 320ஜிபியும் கிடைக்கும். டெல், எச்.பி, சாம்சங், சோனி, அஸுஸ், தோஷிபா என சகலரும் குறுங்கணினிக்கு வந்துவிட்டார்கள்.

முக்கியமாய் பார்க்க வேண்டியது

பேட்டரியின் தாங்கும் நேரம், விசைப்பலகையின் வசதி, ரேம் நிறை குறைகள் (DDR 2 Vs DDR 3)

தொடுதிரை சிலேட்டுகள் / Tablets

ஆப்பிள் ஐபேடு என்றைக்கு ஸ்டீவ் ஜாப்ஸ் கொடுத்தாரோ அன்றைக்குப் பிடித்தது இந்தக் கிறுக்கு. ஐபேடு என்பது நம்மூர் சிலேட் மாதிரி. தொடுதிரை வசதியோடு இணையத்தில் உலாவலாம். புத்தகம் படிக்கலாம்; பாட்டுக் கேட்கலாம்; வீடியோ பார்க்கலாம்; ட்வீட் அடிக்கலாம்; பேஸ்புக்கில் கதைக்கலாம்; அடிப்படை வேலைகள் செய்யலாம்.

மேற்சொன்ன மூன்றைப் போல, இதற்கு தனியாக விசைப் பலகைக் கிடையாது. தனியான சமாசாரங்கள் எதுவும் கிடையாது. டிவிடி டிரைவ் கிடையாது. நியுயார்க் டைம்ஸில் 2010ல் தொடுதிரை சிலேட்டுகள் குறுங்கணினிகளை ஓரங்கட்டிவிட்டன என்று போட்டிருந்தார்கள். எனக்கென்னவோ அப்படித் தோன்றவில்லை. இன்றைக்கும் தொடுதிரை சிலேட்டுகள் குறுங்கணினிகள் செய்யும் வேலைகளைச் செய்யமுடியாது. இன்னொன்று, தொடுதிரை சிலேட்டுகள் பெரும்பாலும், அவர்களின் ஆப் ஸ்டோர்ஸில் (App Stores) இருக்கும் செயலிகளைக் கொண்டே இயங்க முடியும். நாம் சராசரியாக பயன்படுத்தும் எல்லா செயலிகளும், இன்னும் வரவில்லை.

இப்போதைக்கு தொடுதிரை சிலேட்டுகள் போர்டபிள் எண்டர்டெயின்மெண்ட் சாதனங்கள். முக்கியமான அலுவல்களை ஆன் ஸ்க்ரீன் விசைப்பலகையினைக் கொண்டு செய்ய முடியாது. இன்னும் ஐபேடு 2.0 அல்லது சாம்சங்கின் கேலக்சி டாப்போ, ரிம்மின் ப்ளேபுக்கோ, டெல்லின் ஸ்ட்ரீக்கோ முழுமையான பயன்பாட்டோடு வரவில்லை. இப்போதைக்கு காசு கொழுத்திருந்தால், ஏதாவது ஒரு டேப்லட் வாங்கி சீன் போடலாம். ஆனால், தொடுதிரை சிலேட்டுகளின் பயன்பாடுகளும் அதிகரிக்கின்றன. முந்தாநாள், குவால்காம் தங்களுடைய ஸ்னாப் ட்ராகன் ப்ராசசரில் நெட்ப்ளிக்ஸின் லைவ் ஸ்ட்ரீமிங்கினை, ஆண்ட்ராய்ட் இயங்குதளத்தில் போட்டு காண்பித்திருக்கிறார்கள். ஆக, தொடுதிரை சிலேட்டுகள் இயங்குவதும், இயக்குவதும் இன்னும் வரும் நாட்களில் இலகுவாகும்.

இன்றைய நிலைமை

ஆப்பிள் ஐபேடு, சாம்சங் கேலக்சி டேப், எச்.பியின் வரப்போகும் டச்பேட்

கணினி நவீனயுகத்தின் அச்சாணி. மேகக் கணிமை (cloud computing) பரவலாகும்போது, நம்மிடையே இருக்கக்கூடிய கணினியின் திறன்களின் மீதான அழுத்தம் குறையக் கூடும். ஸ்டோரேஜும், ப்ராசசர்களும் சல்லிசாக மாறியிருக்கக் கூடிய ஒரு காலக்கட்டத்தில், இனி நம்முடைய பிரச்னை அதுவல்ல. தொடர்ச்சியான ட்சுனாமியாய் வந்து குவியும் தகவல்களையும், வேலைகளையும் நாம் எப்படி 24×7 ல் மேற்கொள்ளப் போகிறோம் என்பது தான். உங்களுடைய வேலை எப்படியோ, அதற்கேற்றாற்ப் போலத்தான் நீங்கள் வாங்கும் கணினியும் இருக்க வேண்டும். அதை விடுத்து, அடுத்தவன் வாங்கியதைப் போலவே நானும் வாங்குவேன் என்றால், நஷ்டப்படுவது நீங்களாகத் தான் இருப்பீர்கள்.

விரல் ரேகை மாறுவதுப் போல, ஒவ்வொருவருக்கும் பயன்பாடுகளுக்கான ரேகையும் மாறியிருக்கிறது. உங்களின் தொழில் ரேகையினைப் பொறுத்து உங்களுடைய தேர்வு இருக்கட்டும்.

Q: What’s the difference between an I.R.S. agent and a mosquito?
A: One is a bloodsucking parasite, the other is an insect.

அமெரிக்காவின் வருமான வரி துறையின் பெயர் உள்ளூர் வருவாய் சேவை (Internal Revenue Service). அதைப் பற்றிய ஏராளமான ஜோக்குகளில் ஒன்றுதான் மேலே சொன்னது. இது அமெரிக்க இன்கம்டாக்ஸ் ஆட்களுக்கு மட்டுமல்ல. எல்லா ஊருக்கும் வரி என்றாலே `உவ்வே` என்கிற உணர்வு தான். வரியும், இறப்பும் நிச்சயம் என்பது தான் நிதர்சனமான உண்மை.

மார்ச் இந்தியாவில் பலபேருக்கு இரத்தக் கொதிப்பினை அதிகரிக்கும் மாதம். மார்ச் 31 என்பது நிறுவனங்களுக்கும், தனி நபர்களுக்கும், அந்த நிதியாண்டின் வருமானவரியினை செலுத்தும் இறுதி நாள். இப்போது நாம் பிப்ரவரியில் இருக்கிறோம். இப்போதிலிருந்தே திட்டமிட்டால் மார்ச் இறுதிநாள் ஹார்ட் அட்டாக்கினை தவிர்க்கலாம்.

வரி செலுத்துதல் என்பது ஒன்று. வரி விலக்குகள் என்பது இன்னொன்று. இந்தியாவில், வருமான வரி விலக்கு என்பது பல சலுகைகளாக பரவிக் கிடக்கிறது. என்னென்ன வகையில் வரி சலுகைகள் இந்தியாவில் இருக்கிறது என்பதற்கான கையேடு இது.

• காப்பீடு
• வீட்டு வாடகை
• வீட்டுக் கடன்
• ப்ராவிடண்ட் பண்ட்
• பென்ஷன் திட்டம் (NPS)
• பங்கு சார்ந்த காப்பீடு திட்டங்கள் (ULIPs)
• பங்கு சார்ந்த சேமிப்பு திட்டங்கள் (ELSS)
• கட்டமைப்பு கடன் பத்திரங்கள்
• கல்விக் கடன்
• கல்வி – ட்யூஷன் தொகை

காப்பீடு

இந்தியாவில் தொடர்ச்சியாக தவறாக மார்க்கெட் செய்யப்படும் நிதி விஷயங்களில், காப்பீட்டுக்குதான் முதலிடம். ஏஜெண்ட்கள் கமிஷன்களுக்காக, நம்மை டபாய்த்து காப்பீடினை எடுக்க வைத்து விடுகிறார்கள். முதலீடும், காப்பீடும் வெவ்வேறு. நீங்கள், உங்கள் குடும்பத்திற்காக எடுக்கப்பட்ட வாழ்வியல் காப்பீட்டின்(Life Insurance Policy) ப்ரீமியத்தினை வரிச் சலுகையாக பயன்படுத்தலாம். செக்‌ஷன் 80C யின் கீழ் ஒரு லட்சம் வரை நீங்கள் வரிச் சலுகை கோரலாம்.

அதே போல மெடிக்கல் காப்பீட்டிலும் செக்‌ஷன் 80D யின் கீழ் ரூ.15,000 வரை வரிச் சலுகைக்குப் பயன்படுத்தலாம். உங்களின் பெற்றோர்களுக்கான மெடிக்கல் காப்பீட்டில் இன்னொரு ரூ.15000 வரை சலுகையுண்டு.

வீட்டு வாடகை

பெரும்பாலான கார்ப்பரேட் நிறுவனங்கள், தங்களுடைய தொழிலாளர்களுக்கு வீட்டு வாடகை அலவன்ஸ் (HRA – House Rent Allowance) இருப்பதைப் போலத் தான் சம்பளத்தினை நிர்ணயிப்பார்கள். இது வரிச் சலுகைக்கு உரியது. ஒரு வேளை HRA இல்லையென்றால், உங்களின் அடிப்படைச் சம்பளத்திலிருந்து 40% வரைக்கும் (நகரங்களில் இது 50%) நீங்கள் சலுகைகள் கோரலாம். செக்‌ஷன் 80GG யின் கீழ் இது சாத்தியம்.

ஒரு வேளை நீங்கள் வீட்டை வாடகைக்கு விட்டு, வருமானம் ஈட்டினால், அதன் வருடாந்திர வருமானத்திலிருந்து 30% வரை கழிப்பினை (deduction) செக்‌ஷன் 24 வழியாக கோரலாம். மேலும், கழிவுநீர் வரி, வீட்டு வரி போன்ற முனிசபல் வரிகளையும் அதிலிருந்து கழித்து விட்டு, மீதம் வரும் தொகைக்கு மட்டும் வரிக் கட்டலாம்.

வீட்டுக் கடன்

என்னதான் நச்சுபிடித்த மனைவியாய் இருந்தாலும், வீட்டுக் கடன் எடுக்கும் போது இருவருமாய் சேர்ந்தெடுப்பது நலம். நீங்கள் மட்டுமே கடன்காரராய் இருந்தால், வீட்டுக் கடனுக்காக நீங்கள் மாதாமாதம் கட்டும் EMIயின் வருடாந்திரத் தொகையில் ஒரு லட்சம் வரை செக்‌ஷன் 80C யின் கீழ் விலக்கு கோரலாம். இருவருமாய் சேர்ந்து கடனை எடுத்திருந்தால், தனித்தனியாய் 1.5 லட்சம் வரைக்கும் செக்‌ஷன் 24B யின் கீழ் கோரலாம். இரடிப்பு லாபமது.

ப்ராவிடண்ட் பண்ட்

மாதாமாதம் உங்கள் சம்பளத்திலிருந்து போகும் ப்ராவிடண்ட் பண்ட் தொகையும் வரி சலுகைக்கு உதவும். ஒரு லட்சம் வரை செக்‌ஷன் 80C யின் கீழ் கழிப்பினைக் கோரலாம். இது பப்ளிக் ப்ராவிடண்ட் பண்ட் (PPF)க்கும் உண்டு. ஆனால், அதிகப்பட்ச கழிப்பு ரூ.70,000.

தேசிய பென்ஷன் திட்டம் (National Pension Scheme – NPS)

நல்ல படங்களின் தியேட்டர்கள் காற்று வாங்கும். அந்த மாதிரி இந்தியாவில் அறிமுகப்படுத்தப்பட்ட மிக நல்லத் திட்டம் தேசிய பென்ஷன் திட்டம். யாருக்குமே தெரியாது. உங்கள் ஆடிட்டரையும் சேர்த்து, யாருமே சொல்ல மாட்டார்கள். தேசிய பென்ஷன் திட்டம் என்பது உங்களின் ரிட்டயர்மெண்ட் பணத்தினை சேர்க்கும் திட்டம். அதில் வரிச் சலுகைகளும் உண்டு. இதில் போடப்படும் பணத்தில், ஒரு லட்சம் வரை செக்‌ஷன் 80C யின் கீழ் கழிப்பினைக் கோர முடியும்.

பங்கு சார்ந்த காப்பீடு திட்டங்கள் (Unit Linked Insurance Plans – ULIPs)

தனிப்பட்ட ரீதியில் எந்நாளும் யூலிப்களை நான் பரிந்துரை செய்வது கிடையாது. காப்பீடு வேறு. முதலீடு வேறு. ஆனாலும், இந்தியாவின் எல்லா முன்னோடி நிதி நிறுவனங்களும் சந்தையில் யூலிப்களை இறக்கி, மக்களை வாங்க வைத்து விட்டார்கள். அதிலும் எல்.ஐ.சி 2007களில் செய்தது அநியாயம். இப்போது காப்பீடு கண்காணிப்பு அதாரிட்டியால் (IRDA – Insurance Regulatory Development Authority) ஒரளவுக்கு இதன் அயோக்கியத்தனங்கள் மட்டுப்படுத்தப்பட்டிருக்கின்றன. அதிகப்பட்சமாய் ஒரு லட்சம் வரை செக்‌ஷன் 80C யின் கீழ் கழிப்பினைக் கோரலாம்.
எச்சரிக்கை: ஏப்ரல் 2012க்கு பிறகு நேரடி வரி குறியீட்டின் (Direct Tax Code) வரைவுப் படி, இந்த சலுகைகளைக் கோர முடியாது.

பங்கு சார்ந்த சேமிப்பு திட்டங்கள் (Equity Linked Savings Scheme – ELSS)

யூலிப்பினையும், தேசிய பென்ஷன் திட்டத்தையும் விட மேம்பட்ட திட்டமிது. இதில் நேரடியாக சந்தையில் பங்குப் பெறும் வாய்ப்புகள் அதிகம். அதனால் ரிஸ்க்கும் அதிகம். இதன் பெரிய லாபம், ஒரு பக்கம் பங்குச் சந்தையின் மேம்பாட்டில், போட்ட காசும் பெருகும்; இன்னொரு பக்கம், வரிச் சலுகைகளும் கோர முடியும். அதிகப்பட்சமாக ஒரு லட்சம் வரைக்கும் கோரலாம்.
எச்சரிக்கை: ஏப்ரல் 2012க்கு பிறகு நேரடி வரி குறியீட்டின் (Direct Tax Code) வரைவுப் படி, இந்த சலுகைகளைக் கோர முடியாது.

இப்போதைக்கு கண்ணுக்குத் தெரிந்தவரை முதலீடும், வரி சலுகைகளும் நிரம்ப இருக்கும் ஒரே விஷயமாக தேசிய பென்ஷன் திட்டம் தெரிகிறது. போன வருட நேரடி வரி குறியீடு மறுசீராக்கத்தில், தே.பெ.திட்டம் EEE ஸ்டேட்டஸையும் பெற்று விட்டது.

EEE – Exempt-Exempt-Exempt என்பது வரி, உங்கள் பணத்தின் எதிர்கால ஸ்டேட்டஸ் என்பதைப் பற்றியானது. இந்தியாவின் பெரும்பாலான வரிச்சலுகை சமாச்சாரங்கள் EET (Exempt Exempt Tax). அதாவது, ஒரு திட்டத்தில் நீங்கள் பணம் போடும்போது அது வரிக்குள் வராது. இது முதல் E. (விலக்கு) அந்தத் திட்டத்தில் முதலீடாய் உங்கள் பணம் இருக்கும்போது வரி வராது. இது இரண்டாவது E. (விலக்கு) ஆனால், அந்தப் பணத்தினை பின்னாளில் எடுக்கும்போது, எடுத்த பணத்துக்கு வரி வருமா, வராதா என்பது தான் மூன்றாவது E / T. (விலக்கு / வரி) அதனாலேயே EEE பெற்றிருக்கும் தேசிய பென்ஷன் திட்டம் முக்கியமானதாகிறது. ஆக, இதுவரை தே.பெ.திட்டம் பற்றி யோசிக்கவில்லையானால், உங்களின் வங்கியினை அணுகுங்கள். எல்லா தேசியமயமாக்கப்பட்ட வங்கிகளிலும் இதை செய்ய முடியும்.

கட்டமைப்பு கடன் பத்திரங்கள் (Infrastructure Bonds)

மேற்சொன்ன விஷயங்களில் நீங்கள் ஏற்கனவே ஒரு லட்சம் அதிகப்பட்ச தொகையை தாண்டிவிட்டால், கட்டமைப்பு பத்திரங்களில் முதலீடு செய்யுங்கள். இந்தியாவில் கட்டமைப்பு என்பது நீங்கள் ரிட்டயர் ஆகும் வரை நடக்கக்கூடிய விஷயம். அடுத்த 30-40 ஆண்டுகள், இது இல்லாமல் நாட்டை முன்னேற்ற முடியாது. செக்‌ஷன் 80C யின் கீழ் ரூ.20,000 கூடுதலாக கழிப்பினை, கட்டமைப்பு கடன் பத்திரங்களில் முதலீடு செய்வதின் மூலம் பெறலாம். சராசரியாக எல்லா கட்டமைப்பு கடன் பத்திரங்களும் 8% மேலான ரிடர்னை வழங்குகின்றன. ஆக, சலுகைக்கு சலுகையுமாச்சு. போட்டப் பணமும் 8% பாதுகாப்பாக வளரும் வழியுமாச்சு.

கல்வி – ட்யூஷன் கட்டணம்

செக்‌ஷன் 80C யின் கீழ், ஒரு லட்சம் வரையிலானக் கழிப்பினை உங்களின் இரண்டு குழந்தைகளுக்குப் பெறலாம். உ.தா. பொறியியல் படிப்பு படிக்கும் மகன்/ள் இருந்தால், அவர்களின் ட்யூஷன் பீஸ்ஸினை ஒரு லட்சம் ரூபாய் வரைக்கும், உங்கள் வருமானத்திலிருந்து கழிப்பு செய்து பயன் பெறலாம். ட்யூஷன் பீஸ் என்பது மொத்த பொறியியல் படிப்பின் கட்டணைத்தை சாராது. உ-தா ஹாஸ்டல் கட்டணங்கள், பேருந்து கட்டணங்கள்

கல்விக்கடன்

நீங்களோ, உங்கள் மனைவியோ, குழந்தைகளோ மேற்படிப்புக்காகக் கல்விக் கடன் வாங்கியிருந்தால், அதன் வட்டித் தொகையினை வரிக் கழிப்பிற்கு செக்‌ஷன் 80E யின் கீழ் பயன்படுத்திக் கொள்ளலாம். இது மேலே சொன்ன, செக்‌ஷன் 80C யின் கீழ் வந்த ஒரு லட்சத்திற்கும் மேலே பயன்படக்கூடியது. கல்விக்கடனில் கட்டும் வட்டிக்கு மட்டுமே இந்த கழிப்புச் சலுகையுண்டு. அசலுக்கு இல்லை.

சுருக்கமான கையேடு

https://spreadsheets.google.com/pub?key=0ArPLzwxPc2HfdFBnQlZYOGh5bXlrQXc5ZUNzMElMT1E&hl=en_GB&output=html

நன்றி: பிஸினஸ் டூடே